बैंकिङ खबर । हिमालयन बैंक लिमिटेडले आफ्ना सेयरधनीलाई २५ प्रतिशत बोनस सेयर दिने भएको छ । बैंकको मंगलबार साँझ बसेको संचालक समितिको ३४९औँ बैठकले गत आर्थिक वर्षको कमाईबाट २५ प्रतिशत बोनस सेयर वितरण गर्ने प्रस्ताव अघि सारेको हो । बोनस सेयरको साथमा बैंकले कर प्रयोजनका लागि १.३१५८ प्रतिशत नगद लाभांश पनि दिने निर्णय गरेको छ ।
प्रस्तावित लाभांश नेपाल राष्ट्र बैंकबाट स्वीकृत भई बैंकको आगामी साधारणसभाले पारित गरेपछि सेयरधनीले पाउनेछन् । हाल हिमालयन बैंकको चुक्तापुँजी छ अर्ब ४९ करोड १६ लाख रुपैयाँ रहेको छ । २५ प्रतिशत बोनस सेयर वितरण गरेपछि बैंकको चुक्तापुँजी आठ अर्ब ११ करोड ४५ लाख रुपैयाँ पुग्नेछ ।
