१५ जिल्लाका २४ वटा शाखा कार्यालयमार्फत गाउँ गाउँमा वित्तीय पहुँच पुर्याउँदै आएको जनउत्थान सामुदायिक लघुवित्त विकास बैंक लिमिटेडले आफ्नो सामाजिक उत्तरदायित्व अन्र्तगत बुटवल–६, पाखापानी, रुपन्देहीका वाढीपिडित ५ घरपरिवारलाई एक कार्यक्रमको आयोजना गरी राहत स्वरुप खाधान्न वितरण गरेको छ । साथै बैंकको कार्यक्षेत्र भएको पर्साको ठोरी, बाँकेको शम्शेरगँज, बर्दियाको ककौरा र कैलालीको टिकापुरमा समेत बाढीबाट क्षति पुगेका घरपरिवारलाई आफ्नो शाखामार्फत राहत वितरण गर्ने कार्य समेत भईरहेको बैंकका कार्यकारी प्रमुख श्रीराम पोख्रेलले जानकारी गराए ।
यस बैंकले बैंकिङ्ग समुदायमा आवद्ध रहेका सदस्यहरुमा पर्ने मृत्युदेखि विपद् र उत्कृष्टताको आधारमा उनीहरुका छोराछोरीको अध्ययनको लागि समेत सहयोग गर्दै आएको छ ।
कार्यक्रम बैंकका प्रमुख कार्यकारी अधिकृत श्रीराम पोख्रेलको सभापतित्वमा भएको थियो । प्रमुख अतिथिको रुपमा संथापक सेयरधनी जोगलाल विश्वकर्माको उपस्थिती रहेको थियो भने कार्यक्रम संचालन बैंकका प्रबन्धक दल बहादुर लोहागुनले गरेका थिए ।
