कृषि विकास बैंक लिमिटेडसहित तीन कम्पनीले शुक्रबार बोनस सेयर र हकप्रद सेयर नेप्सेमा कारोबारका लागि सूचिकृत गराएका छन् । कृषि विकास बैंकका अलावा डिप्रोक्स लघुवित्त विकास बैंक लिमिटेड र सगरमाथा फाइनान्स लिमिटेडले सेयर सूचिकृत गराएका हुन् ।
नेप्सेका अनुसार, कृषि विकास बैंकले एक करोड १८ लाख १२ हजार आठ सय कित्ता बोनस सेयर सूचिकृत गराएको छ । बैंकले गत आर्थिक वर्षको कमाईबाट सेयरधनीलाई २० प्रतिशत बोनस सेयर वितरण गरेको थियो ।
त्यस्तै, डिप्रोक्स लघुवित्तले पनि नौ लाख दुई हजार सात सय ३३ कित्ता बोनस सेयर नेप्सेमा सूचिकृत गराएका छ । कम्पनीले गत आर्थिक वर्षको कमाईबाट ३५ प्रतिशत बोनस सेयर र १७.६३ प्रतिशत नगद लाभांश वितरण गरेको थियो ।
यता, सगरमाथा फाइनान्स लिमिटेडको २९ लाख ५४ हजार तीन सय ८९ कित्ता हकप्रद सेयर र १२ लाख १६ हजार चार सय ६९ कित्ता बोनस सेयर एकैपटक नेप्सेमा सूचिकृत गराएको छ । फाइनान्सले गत पुस महिनामा ८० प्रतिशत हकप्रद सेयर निष्काशन गरेको थियो भने गत आर्थिक वर्षको कमाईबाट हकप्रदपछिको चुक्तापुँजीको १८.३ प्रतिशत बोनस सेयर वितरण गरेको थियो ।
