प्रभु क्यापिटल लिमिटेडले दुई सय प्रतिशत अर्थात एक बराबर दुईका अनुपातमा हकप्रद सेयर निष्काशन गर्ने भएको छ । कम्पनीले चुक्तापुँजी वृद्धि गरी २१ करोड रुपैयाँ पुर्याउन उक्त अनुपातमा हकप्रद सेयर निष्काशन गर्ने निर्णय गरेको हो । कम्पनीको सञ्चालक समितिको उक्त निर्णय शनिबार सम्पन्न विशेष साधारणसभाले पारित गरेको छ ।
सभामा कम्पनीको ५१ प्रतिशत सेयर प्रभु बैंक लिमिटेडले खरिद गरि प्रभु क्यापिटल लिमिटेडलाई विधिवत सहायक बनाएको घोषणा समेत गरिएको छ । साथमा कम्पनीको प्रवन्धपत्र तथा नियमावलीमा आवश्यक संशोधन प्रस्ताव समेत उक्त साधारणसभाले पारित गरेको छ ।
साधारणसभा संचालक समितिका अध्यक्ष बिनोद थकालीको अध्यक्षतामा कमलादी, काठमाडौंमा सम्पन्न भएको थियो । सभामा संस्थाका सेयरधनी, संचालक, लेखापरीक्षक, विभिन्न सरकारी निकायका प्रतिनिधि, कर्मचारी, पत्रकार एवं अन्य अतिथिहरुको उपस्थिती रहेको थियो ।
