राधी विद्युत कम्पनी लिमिटेडको चार लाख १० हजार कित्ता साधारण सेयर (आईपिओ) वैशाख १९ गतेदेखि निष्काशन हुने भएको छ । कम्पनीले आयोजना प्रभावित लमजुङबासीका लागि एक सय रुपैयाँ अंकित मूल्यमा चार करोड १० लाख रुपैयाँ बराबरको सेयर जारी गर्न लागेको हो ।
कम्पनीले निष्काशन गर्न लागेको कुल सेयरमध्ये दुई लाख ४६ हजार कित्ता सेयरका लागि आयोजना अति प्रभावित साविक घेर्मु गाविस तथा हाल मस्र्याङदी गाउँपालिका वडा नम्बर ५ का बासिन्दाका लागि र बाँकी एक लाख ६० हजार कित्ता सेयरका लागि आयोजना न्यून प्रभावित साविक ताघ्रिङ गाविस अर्थात मस्र्याङदी गाउँपालिका वडा नम्बर ४ का बासिन्दाले आवेदन दिन पाउनेछन् । उक्त सेयरमा न्यूनतम ५० कित्ता (५ हजार रुपैयाँ) देखि अधिकतम ४ हजार कित्तामा (४ लाख रुपैयाँ) जेठ २ गतेसम्म आवेदन दिन पाइनेछ ।
इच्छुक लगानीकर्ताले नबिल बैंक लमजुङ शाखा, ओम डेभलपमेन्ट बैंकको लमजुङ शाखा, कैलाश विकास बैंको लमजुङ शाखा र राधी हाइड्रो पावर, पावर स्टेशन घेर्मु ३ लमजुङबाट आवेदन दिन सक्नेछन् । कम्पनीको सेयरलाई इक्रा नेपालले ग्रेड थ्रि रेटिङ प्रदान गरेको छ । जसले कम्पनीको अवस्था औसत रहेको संकेत गर्दछ । कम्पनीले सेयर निष्काशन तथा बिक्री प्रबन्धकमा नबिल इन्भेष्टमेन्ट बैंकिङ लिमिटेडलाई नियुक्त गरेको छ ।
पहिलो चरणमा १ सय रुपैयाँ अंकित दरका ४ करोड दश लाख रुपैयाँ बराबरको शेयर आयोजना प्रभावित लमजुङ बासीहरुलाई बिक्री खुल्ला गरेको कम्पनीले त्यसपश्चात सर्वसाधारणका लागि आइपीओ जारी गर्ने बताएको छ । कम्पनीले आयोजना प्रभावितलाई सहित कुल १० करोड २५ लाख रुपैयाँ बराबरको दश लाख २५ हजार कित्ता साधारण सेयर निष्काशन गर्नेछ ।
