कारोबार खुलेको पहिलो एक घण्टाभित्रमा चार प्रतिशतले बढेर दुई पटक सर्किट ब्रेक लागेको सेयर बजार अन्ततः ६.५९ अंकले घटेर बन्द भएको छ । दोस्रो सर्किट ब्रेक लागेर १७४५ अंकसम्म पुगेको नेप्से परिसूचक १६६०.५२ अंकमा झरेको हो । सुरुमा बढिरहेका उपसूचकहरु एकाएक घट्न थालेपछि समग्र बजार नै प्रभावित भएको देखिएको छ । बीमा र व्यापार क्रमशः ६७.६५ र १.४१ अंकले बढेका छन् भने बैंकिङ, होटल, विकास बैंक, जलविल्ुत्, फाइनान्स र अन्य क्रमशः ७.२८, ३५.३९, १४.०८, २९.५२, ८.८४ र ५.५ अंकले घटेका छन् ।
परिसूचक ओरालो लागेपनि कारोबार रक मभने उल्लेख्य रुपमा बढेको छ । आइतबार एक अर्ब पनि पुग्न नसकेको कारोबार रकमले सोमबार साढे दुई अर्ब नाघेको छ । दिनभरिमा १४४ वटा कम्पनीको ४३ लाख २० हजार पाँच सय २१ कित्ता सेयर १३ हजार एक सय ७१ पटक खरिदविक्री हुँदा दुई अर्ब ५२ करोड २५ लाख ४९ हजार छ सय ३३ रुपैयाँको कारोबार भएको छ ।
नेपाल बैंकको मात्रै १३ करोड ५४ लाख ६७ हजार नौ सय ५० रुपैयाँको कारोबार भएको छ भने एनसीसी बैंकको पनि १३ करोड ४३ लाख रुपैयाँ र लुम्बिनी जेनेरल इन्स्योरेन्सको १२ करोड ६९ लाख रुपैयाँको कारोबार भएको छ । एसियन लाइफ इन्स्योरेन्स र नेशनल लाइफ इन्स्योरेन्सको आठ करोड। शिखर इन्स्योरेन्सको सात करोड र सानिमा बैंक, प्रभु बैंक, नेपाल इन्भेष्टमेन्ट बैंक, लाइफ इन्स्योरेन्स कर्पोरेसन नेपाल लगायतको छ करोडमाथिको कारोबार भएको छ ।
राष्ट्रिय बीमा कम्पनीका सेयरधनीले १० प्रतिशतका दरले आफ्नो सम्पत्ति बढाउँदा एभरेष्ट इन्स्योरेन्स, प्रुडेन्सियल इन्स्योरेन्स, गुराँस लाइफ इन्स्योरेन्स, नमस्ते वित्तीय संस्था, गोर्खाज फाइनान्स र युनाइटेड इन्स्योरेन्सका सेयरधनीले क्रमशः ९.९९, ९.९८, ९.९५, ९.९१, ९.४८ र ९.०६ प्रतिशतका दरले कमाएका छन् । सानिमा बैंक, गुहेश्वरी फाइनान्स, सूर्या लाइफ इन्स्योरेन्स लगायत ५ कम्पनीका सेयरधनीले ८ प्रतिशतभन्दा बढीले कमाएका छन् ।
महिला सहयात्रा माइक्रोफाइनान्सका सेयरधनीले ७.८२ प्रतिशतका दरले आफ्नो सम्पत्ति घटाउँदा स्वाबलम्बन विकास बैंकका सेयरधनीले ७.६४ प्रतिशतका दरले गुमाएका छन् । ग्रीन डेभलपमेन्ट बैंक, निर्धन उत्थान बैंक, आईसी एफसी फाइनान्स र सिभिल बैंकका सेयरधनीले ६ प्रतिशतभन्दा बढीले गुमाएका छन् भने देवः विकास बैंक, नागबेली लघुवित्त, नेपाल लाइफ इन्स्योरेन्स र मञ्जुश्री फाइनान्सका सेयरधनीले ५ प्रतिशतका दरले कमाएका छन् ।
