कैलाश विकास बैंक लिमिटेडले २० प्रतिशत अर्थात पाँच बराबर एकको अनुपातमा हकप्रद सेयर निष्काशन गरेको छ । बैंकले एक सय रुपैयाँ अंकित मूल्यमा ३१ करोड ६० लाख ६७ हजार दुई सय रुपैयाँ बराबरको ३१ लाख ६० हजार छ सय ७२ कित्ता सेयरको बिक्री शुक्रबारदेखि खुला गरेको हो ।
बैंकको हकप्रद सेयरमा पुस १३ गतेसम्म कायम लगानीकर्ताले फागुन ६ गतेदेखि चैत १० गतेसम्म आवेदन दिन सक्ने छन् । बैंकले हकप्रद सेयर निष्कासन तथा बिक्री प्रबन्धकमा ग्लोबल आइएमई क्यापिटल लिमिटेडलाई नियुक्त गरेको छ । विक्री प्रबन्धकको कार्यालय र कैलाश विकास बैंकका सबै शाखा कार्यालयबाट हकप्रद भर्न पाइने बताइएको छ ।
कैलाश विकास बैंक, मेट्रो डेभलपमेन्ट बैंक र नेपाल एक्सप्रेस फाईनान्स गाभिएर बनेको कैलाश विकास बैंककोे चुक्ता पुँजी हाल एक अर्ब ५८ करोड रुपैयाँ रहेको छ । २० प्रतिशत हकप्रद वितरणपश्चात बैंकको चुक्तापूँजी एक अर्ब ९० करोड रुपैयाँको हाराहारीमा पुग्नेछ । बैंकले गत आर्थिक वर्षको मुनाफाबाट लगानीकर्तालाई २५ प्रतिशत लाभांश दिने निर्णय गरेको छ ।
