नेरुडे लघुवित्त विकास बैंकले हकप्रद सेयर निष्काशन गर्नका लागि नेपाल धितोपत्र बोर्डको अनुमति पाएको छ । बैंकले ५० प्रतिशत अर्थात दुई बराबर एक को अनुपातमा हकप्रद सेयर जारी गर्ने अन्मति पाएको हो । नेरुडेले एक सय रुपैयाँ अंकित मूल्यमा नौ करोड रुपैयाँ बराबरका नौ लाख कित्ता हकप्रद सेयर जारी गर्न लागेको हो । हकप्रद निष्काशनको अनुमति माग गर्दै बैंकले गत असोज २८ गते बोर्डमा आवेदन दिएको थियो । कम्पनीको सेयर निष्काशन तथा विक्री प्रबन्धकमा एनसिएम मर्चेन्ट बैंकिङ लिमिटेड रहेको छ ।
गत आर्थिक वर्षको कमाईबाट लगानीकर्तालाई २० प्रतिशत बोनस बितरणको प्रस्ताव गरेको लघुवित्तले आगामी वार्षिक साधारणसभाबाट हकप्रद र बोनस दुबै प्रस्ताव पारित गर्नेछ । हकप्रद सेयर र बोनस सेयर वितरण गरिसकेपछि नेरुडे लघुवित्तको चुक्तापुँजी ३० करोड ६० लाख रुपैयाँ पुग्नेछ ।
