समता माइक्रोफाइनान्स वित्तीय संस्था लिमिटेडको ९४ हजार ८०० कित्ता साधारण सेयर (आईपिओ) मंगलबार (पुस १९ गते)देखि खुला भएको छ । संस्थाले १०० रुपैयाँ अंकित मूल्यमा ९४ लाख ८० हजार रुपैयाँ बराबरको सेयर सर्वसाधारणका लागि विक्री गरेको हो । जसमध्ये, एक हजार आठ सय ९६ कित्ता सेयर कर्मचारी र चार हजार ७४० कित्ता म्युचुअल फण्डहरुलाई आरक्षित गरिएको जनाइएको छ । बाँकी सेयरका लागि सर्वसाधारणले आवेदन दिन सक्नेछन् ।
उक्त आईपिओमा छिटोमा पुस २२ र ढिलोमा माघ ४ गतेसम्म आवेदन दिन पाइनेछ । न्युनतम ५० देखि अधिकतम ५०० कित्तासम्म आवेदन दिन सकिने बताइएको छ । समताको सेयर सिनष्काशन तथा विक्री प्रबन्धकमा एनआइबिएल क्यापिटल रहेको छ । एनआइबिएल क्यापिटलको कार्यालय लाजिम्पाट, नेपाल इन्भेष्टमेन्ट बैंकका शाखाहरु, बारास्थित माइक्रोफाइनान्सको कार्यालय लगायत बिभिन्न ११ संस्थामा सेयर आवेदन बुझाउन सकिने बताइएको छ ।
बाराको सिमरामा प्रधान कार्यालय रहेको माइक्रोफाइनान्सको चुक्ता पूँजी हाल दुई करोड २१ लाख २० हजार रुपैयाँ रहेको छ । आईपिओ बाँडफाँड गरेपछि संस्थाको पुँजी तीन करोड १६ लाख रुपैयाँ पुग्नेछ ।
