बैंकिङ खबर/ मेडिकल कलेज व्यवसायी दुर्गा प्रसाईं सोमबार उच्च अदालत पाटनका दुईवटा फरक इजलासमा भएको सुनुवाइपछि धरौटी बुझाएर थुनामुक्त भएका छन्। एक मुद्दामा उनीविरुद्ध हिंसात्मक प्रदर्शनमा संलग्न भएको अभियोग थियो भने अर्कोमा कर्जा दुरुपयोगको गम्भीर आरोप छ।
चैत १५ को प्रदर्शनसम्बन्धी मुद्दामा रिहा
तीनकुनेमा चैत १५ गते भएको प्रदर्शनमा संलग्न रहेको अभियोगमा उनी काठमाडौं जिल्ला अदालतबाट पुर्पक्षका लागि थुनामा परेका थिए। उनी गत जेठ २९ गतेदेखि डिल्लीबजार कारागारमा थुनामा थिए। तर उच्च अदालत पाटनले जिल्ला अदालतको आदेश बदर गर्दै उनलाई ३ लाख रुपैयाँ धरौटीमा रिहा गर्न आदेश दिएको हो।
बैंकिङ कसुरको मुद्दामा पनि धरौटीमा रिहा
अर्को मुद्दामा उच्च अदालतको वाणिज्य इजलासले २५ लाख रुपैयाँ धरौटी माग गर्दै प्रसाईंलाई रिहा गर्न आदेश दिएको हो। यो मुद्दामा उनकी श्रीमती उमा, छोरा निराजन र छोरी आर्जु प्रसाईंलाई पनि प्रतिवादी बनाइएको छ। अदालतले माग गरेको धरौटी बुझाएपछि प्रसाईं सोमबार राति नै कारागारबाट रिहा भएका हुन्।
अब उनका परिवारका सदस्यहरू पनि अदालतमा बयान दिनुपर्नेछ। यदि कसुर ठहर भएमा उनीहरूलाई बिगो रकम र त्यसैबराबरको जरिवाना मात्र होइन, कैद सजाय पनि हुनसक्नेछ।
१८ करोड ४४ लाखको बिगो
प्रसाईंमाथि कर्जा दुरुपयोग गरेको आरोपमा १८ करोड ४४ लाख रुपैयाँको बिगो दाबी गरिएको छ।
श्रीमती उमा प्रसाईं: ९ करोड
छोरी आर्जु प्रसाईं: ९ करोड
छोरा निराजन प्रसाईं: ४ करोड
अनुसन्धान अनुसार, उनले जुन प्रयोजनका लागि कर्जा लिएको थिए, त्यो प्रयोजनमा प्रयोग नगरी पुरानो कर्जा चुक्ता गर्न र अन्य कम्पनीका लागि खर्च गरेका छन्।
अनुसन्धानका निष्कर्ष
प्रहरीको केन्द्रीय अनुसन्धान ब्युरो (CIB) ले गरेको अनुसन्धान अनुसार दुर्गा प्रसाईंले एनआईसी एसिया बैंकबाट लिएको १२ करोड ५० लाख कर्जा, गुडविल फाइनान्सबाट लिएको १० करोड र नेपाल इन्भेस्टमेन्ट बैंकबाट लिएको ५ करोड कर्जालाई अन्य उद्देश्यमा प्रयोग गरेका छन्।
यूए मेडिकल सप्लायर्स एन्ड इक्विपमेन्ट, होटल अट्रियुम, पूर्वाञ्चल क्यान्सर अस्पताल जस्ता कम्पनीका नाममा लिइएको कर्जा रकम उनले अन्यत्र रकमान्तर गरेर बीएन्डसी मेडिकल कलेजको पुरानो ऋण तिर्न प्रयोग गरेका थिए।
एनआईसीबाट लिएको १२.५ करोडको कर्जामध्ये ११.८ करोड बन्दना कन्स्ट्रक्सनलाई दिइएको थियो। त्यही कन्स्ट्रक्सन कम्पनीबाट करिब ५ करोड ४४ लाख रुपैयाँ अन्य व्यक्तिहरू हुँदै प्रसाईंको मेडिकल कलेजका ऋण तिरिएको पाइयो। यसमा ३ करोड ३७ लाख एक व्यक्तिका नाममा र त्यसपछि प्रदीप मित्तललाई भुक्तानी गरिएको देखिएको छ।
त्यस्तै, होटल अट्रियुमको नाममा लिएको कर्जाबाट क्यासिनो, स्विमिङ पुल, ब्यांक्वेट हल बनाउन भनिए पनि ती काम नगरी पुरानो कर्जा तिरिएको छ। यूए मेडिको सप्लायर्सका लागि लिएको १० करोडमध्ये पनि महालक्ष्मी इन्टरप्राइजेजमार्फत फिर्ता लिएर बीएन्डसीको ऋण चुक्ता गरिएको खुलेको छ।
बैंकिङ कसुर तथा सजाय ऐन, २०६४ अनुसार, कर्जा दुरुपयोग गरेमा:
१–१० करोड बिगो: ४–६ वर्ष कैद
१०–५० करोड बिगो: ६–८ वर्ष कैद
बिगो बराबरको जरिवाना पनि तिर्नुपर्ने व्यवस्था छ। प्रसाईंले अदालतमा बयान दिँदै परिवारका नाममा रहेका सबै कम्पनीहरू आफैंले चलाएको र सम्पूर्ण जिम्मेवारी आफूले लिने बताएका छन्।
