बैंकिङ खबर/ २०८१ कात्तिक मसान्तसम्ममा धितोपत्र बजारले उल्लेखनीय वृद्धि देखाएको छ। नेपाल स्टक एक्सचेन्ज (नेप्से) सूचकाङ्ग यस अवधिमा २७४८.७९ मा पुगेको छ, जुन अघिल्लो वर्षको कात्तिक मसान्तमा रहेको १८५२.०९ भन्दा ८९६.७० अंकले वृद्धि भएको हो।
समीक्षा अवधिमा धितोपत्र बजार पुँजीकरण ४३ खर्ब ७६ अर्ब ९० करोड रुपैयाँ पुगेको छ। यो अघिल्लो वर्षको सोही अवधिमा २८ खर्ब ५३ अर्ब १ करोड रुपैयाँ रहेको थियो, जसमा यो वर्ष १५ खर्ब २३ अर्ब ८९ करोडको वृद्धि देखिएको छ।
२०८१ कात्तिक मसान्तमा नेप्सेमा सूचीकृत कम्पनीहरूको संख्या २६७ पुगेको छ। यीमध्ये, १२९ बैंक तथा वित्तीय संस्था र बीमा कम्पनी, ९१ जलविद्युत् कम्पनी, २२ उत्पादन तथा प्रशोधन उद्योग, ७ होटल, ७ लगानी कम्पनी, ४ व्यापारिक संस्था, र ७ अन्य समूहका कम्पनी रहेका छन्।
धितोपत्र बजार पुँजीकरणको हिस्सा हेर्दा, बैंक तथा वित्तीय संस्था र बीमा कम्पनीको हिस्सा ५८.५ प्रतिशत रहेको छ। जलविद्युत् कम्पनीको हिस्सा १५.८ प्रतिशत, लगानी कम्पनीको ७.७ प्रतिशत, उत्पादन तथा प्रशोधन उद्योगको ५.४ प्रतिशत, होटलको २.९ प्रतिशत, व्यापारिक संस्थाको ०.५ प्रतिशत, र अन्य समूहको ९.२ प्रतिशत रहेको छ।
बीमा कम्पनीहरूको बजार पुँजीकरण र सूचीकृत संस्थाहरूको सहभागिता उल्लेखनीय छ। यी कम्पनीहरूले पुँजी बजारको स्थायित्व र विकासमा महत्वपूर्ण योगदान पुर्याउँदै आएका छन्। नेपाल धितोपत्र बोर्डले समीक्षा अवधिमा ५ अर्ब ८९ करोड बराबरको हकप्रद शेयर र १ अर्ब ९० करोड बराबरको म्युचुअल फन्डलाई सार्वजनिक निष्कासनका लागि अनुमति दिएको छ।
समीक्षा अवधिमा कुल ७ अर्ब ५८ करोड रुपैयाँ बराबरको थप धितोपत्र सूचीकृत भएका छन्, जसमा ३ अर्ब ९१ करोडको हकप्रद शेयर, ३ अर्ब ६७ करोडको बोनस शेयर, र रु। ४७ लाख बराबरको एफपीओ रहेका छन्।
