बैंकिङ खबर/ अधिकांश बैंकहरुको प्रतिशेयर आम्दानीमा गिरावट आएको छ । वाणिज्य बैंकहरुले गत आर्थिक वर्षको अन्तिम त्रैमाससम्मको वित्तीय विवरण अनुसार प्रतिशेयर आम्दानीमा गिरावट आएको पाइएको हो ।
अघिल्लो आर्थिक वर्षको तुलनामा २० वाणिज्य बैंकहरुमध्ये १५ वटाको प्रतिशेयर आम्दानी घटेको छ भने पाँच वटाको मात्र बढेको छ । समग्र रुपमा हेर्ने हो भने बैंकहरुको यस्तो आम्दानीमा गिरावट आएको देखिन्छ ।
सार्वजनिक विवरण अनुसार प्रतिशेयर आम्दानीमा स्ट्याण्डर्ड बैंक अग्रस्थानमा रहेको छ । यस अवधिमा बैंकको यस्तो आम्दानी ३५ रुपैयाँ नौ पैसा रहेको छ । अघिल्लो आवको तुलनामा २ रुपैयाँ ३० पैसाले घटेको छ ।
दोस्रोमा एभरेष्ट बैंक रहेको छ । यस अवधिमा बैंकको यस्तो आम्दानी ३१ रुपैयाँ ४५ पैसा रहेको छ । अघिल्लो आवको सोही अवधिमा बैंकको यस्तो आम्दानी ३१ रुपैयाँ ७२ पैसा रहेको छ ।
त्यस्तै, ग्लोबल आइएमई बैंकको प्रतिशेयर आम्दानी चाँही बढेको छ । अघिल्लो आवमा २० रुपैयाँ ७७ पैसा रहेको यस्तो आम्दानी बढेर २६ रुपैयाँ ०९ पैसा पुगेको छ ।
यस अवधिमा नबिल बैंकको २६ रुपैयाँ ०९ पैसा, कृषि विकास बैंकको २४ रुपैयाँ ७५ पैसा, राष्ट्रिय वाणिज्य बैंकको २१ रुपैयाँ ७३ पैसा, सिद्धार्थ बैंकको २१ रुपैयाँ ४० पैसा प्रतिशेयर आम्दानी रहेको छ । साथै, एनआइसी एशिया बैंकको प्रतिशेयर आम्दानी ९ रुपैयाँ, कुमारी बैंकको ८ रुपैयाँ रहेको छ ।
