बैंकिङ खबर/ बैंकहरुको कर्जा निक्षेप अनुपात (सिडि रेसियो) औषतमा ९० प्रतिशतभन्दा तल झरेको छ । नेपाल राष्ट्र बैंकका अनुसार जेठ लागेदेखि बैंकहरुमा निक्षेप संकलन केहि बढ्न थालेसँगै बैंकहरुको सिडि रेसियो घट्न थालेको हो ।
राष्ट्र बैंकको तथ्यांक अनुसार गत शुक्रबारबाट बैंकहरुको कर्जा निक्षेप अनुपात ९० प्रतिशतबाट तल ओर्लिएको हो । शुक्रबार नै बैंकहरुको यस्तो आनुपात औषतमा ८९.९६ प्रतिशतमा झरेको थियो ।
आइतबारसम्ममा बैंकहरुको औसतमा सिडि रेसियो ८९.९९ प्रतिशत छ । तर पनि अहिले एक दर्जन बढी बैंकहरुको सिडि रेसियो ९० प्रतिशतभन्दा माथि नै छ ।
पुस अन्तिमसम्ममा बैंकहरुको सिडि रेसियो ९० प्रतिशतभन्दा तल थियो । माघ लागेसँगै उक्त रेसियो बढेर ९० प्रतिशतभन्दा माथि पुगेको थियो । बैंकहरुको सिडि रेसियो झण्डै ५ महिनापछि ९० प्रतिशतभन्दा तल झरेको हो ।
नेपाल राष्ट्र बैंकले चालु आर्थिक वर्षको मौद्रिक नीतिमार्फत नै सिसिडि रेसियो खारेज गर्दै सिडि रेसियो लागु गरेको थियो । बैंकहरुलाई आगामि असार मसान्तसम्ममा सिडि रेसियो ९० प्रतिशतभन्दा तल ल्याउनुपर्ने अवस्था छ ।
आर्थिक वर्षको अन्तिमसम्ममा पनि सिडि रेसियो ९० प्रतिशतभन्दा माथि नै राखेपछि पछिल्लो केहि समययता केन्द्रीय बैंकले बैंकहरुलाई दबाब दिन थालेको छ ।
जेठ यता बैंकहरुमा निक्षेप संकलन १७ अर्ब रुपैयाँले बढेको छ । सोमबारसम्ममा वाणिज्य बैंकहरुको निक्षेप संकलन ४३ खर्ब ८७ अर्ब रुपैयाँ पुगेको केन्द्रीय बैंकले जनाएको छ ।
