बजारको डलर अभाव कम गर्न नेपाल राष्ट्र बैंकले अल्पकालीन उपाय अपनाउने भएको छ । नेपाल राष्ट्र बैंकले सिंगापुरबाट कार्गोमार्फत डलर ल्याउने निर्णय गरेको हो । सिंगापुरको सीआईएमबी बैंकमा राष्ट्र बैंकको नाममा रहेको खाताबाट नेपालमा कार्गो गरेर एक करोड डलर ल्याउन लागिएको हो । डलर एक साताभित्रमा नेपाल आइपुग्नेछ ।
पछिल्लो दुई महिना नेपाली बजारमा नगद डलर अभाव चुलिएको छ । यसै तथ्यलाई मध्यनजर गर्दै राष्ट्र बैंकले पहिलोपटक कार्गो गरेर डलर आयात गर्न लागेको हो । यसअघि, राष्ट्र बैंकले डलर बिक्री गरेर भारु आयात गर्दै आएको थियो
बैंकहरुलाई पनि डलर आयातको अनुमति
राष्ट्र बैंकले वाणिज्य बैंकहरूलाई पनि डलर आयातका लागि सर्तसहित अनुमति दिने निर्णय गरेको छ । स्ट्यान्डर्ड चार्टर्ड बैंकको नेतृत्वमा केही वाणिज्य बैंकले बजारमा देखिएको अभाव हटाउनका लागि डलर आयात गर्ने अनुमति मागेको थिए । तर, राष्ट्र बैंकमा आफैँ डलर खरिद गर्ने कि बैंकहरूलाई डलर आयात गर्न दिने भन्ने विषयमा विवाद हुँदा कुनै निर्णय हुन सकेको थिएन ।
