बैंकिङ खबर/ जव प्रहरीसम्म सूचना पुग्यो तव खुल्यो एउटा यस्तो पर्दा । जहाँ राष्ट्र बैंकको स्वीकृति बिना आधिकारीक ढंगले बैंकिङ कारोबार गरेको पाइयो । त्यो पनि राष्ट्र बैंको नक्कली इजजातपत्र आफै तयार गरेर काम गरेको भेटियो । अनि स्थानीयलाई भनियो ‘राष्ट्र बैंकबाट स्वीकृति प्राप्त आधिकारीक संस्था ।’ अन्तत नक्कली काम गर्ने यी व्यक्ति चितवनबाट समातिएका छन् ।
चितवनमा बिना स्वीकृति बैंकिङ कारोबार गर्ने एक जना पक्राउ परेका छन् । जिल्ला प्रहरी कार्यालय चितवनले मेक्स मि इ–कमर्स इन्टरनेशनलले अवैधरुपमा बैंकिङ कारोबार गरेको जनाउँदै सञ्चालकलाई पक्राउ गरको हो। पक्राउ पर्नेमा संस्थाका कार्यकारी निर्देशक दैलेख आठबिस नगरपालिका–७ घर भई हाल जिल्ला भरतपुर महानगरपालिका–७ बस्ने २७ वर्षीय पुष्पराज तिमिल्सेना छन्।
नेपाल राष्ट्र बैंकबाट मान्यता (इजाजत) प्राप्त रहेको भनी सर्वसाधारणलाई झुक्याउन सफल मेक्स मि इ–कमर्सले राम्रो ब्याज दिने संस्था रहेको भन्दै आर्थिक प्रलोभनमा पारेर निक्षेप संकलन र ऋण प्रवाह गर्दै आइरहेको प्रहरीले जनाएको छ। प्रहरीका अनुसार तिमिल्सेना आफैंले नेपाल राष्ट्र बैंकको नक्कली इजाजत पत्र तयार गरेको प्रारम्भिक अनुसन्धानबाट खुल्न आएको छ। सञ्चालक तिमिल्सेनाविरुद्ध ठगीसम्बन्धी अपराधको जाहेरीसमेत परेपछि प्रहरीले अनुसन्धान अघि बढाएको हो।
