
बैंकिङ खबर । आशा लघुवित्त वित्तीय संस्थाले ३ दिने सीपमूलक तालिम संचालन गरेको छ । वित्तीय संस्थाले शाखाकार्यालय पटेर्वा सुगौली पर्सामा आबद्ध सदस्यहरुमध्ये ३५ जना महिला सदस्यहरुलाई निःशुल्क रुपमा लुगा धुने सर्फ तथा दालमोठ बनाउने तालिम प्रदान गरेको हो । तालिम कार्यक्रमलाई उद्घाटन गर्दै शाखा कार्यालय पटेर्वा सुगौलीका शाखा प्रबन्धक सियाराम चौधरीले यस्तो किसिमको कार्यक्रमले महिलाहरु लाई उद्यमशिल बन्न थप सहयोग पुग्ने कुरा ब्यक्त गर्नुभयो । साथै यस कार्यक्रम पश्चात सदस्यहरुको लघु ब्यवसायमा बृद्धी भई यस क्षेत्रका विपन्न महिलाहरुको आर्थिक क्रियाकलापमा वृद्धि हुनुका साथै आत्म निर्भरता तर्फ उन्मुख हुन सहयोग पुग्ने विश्वास व्यक्त गर्नुभयो ।
वित्तीय संस्थामा कार्यरत कल्याणी खरेलले प्रशिक्षण दिनुभएको उक्त तालिमबाट सहभागीहरुले कम लागतमा लुगाधुने सर्फ तथा दालमोठ बनाउने तरिका, बजारीकरण लगायतका सम्बन्धमा जानकारी हासिल गरेका थिए । हालै यस वित्तीय संस्थाले विभिन्न शाखाकार्यालयहरु मार्फत झण्डै २,१२० जना विपन्न महिलाहरुलाई यस प्रकारका सीपमूलक तालिमहरु प्रदान गरिसकेको छ ।
वित्तीय संस्थाका प्रमुख कार्यकारी अधिकृत बद्री प्रसाद दुलालले यस्ता सीपमूलक तालिमहरु सम्पूर्ण शाखा कार्यालयहरुबाट संचालन गरी सदस्यहरुको सीप अभिवृद्धि गरी आत्मनिर्भरतातर्फ उन्मुख गराउन वित्तीय संस्था क्रियाशील रहने विचार व्यक्त गर्नुभयो ।
नेपाल राष्ट्र बैंकबाट‘घ’वर्गको राष्ट्रिय स्तरको वित्तीय संस्थाका रुपमा स्वीकृतीप्राप्त आशा लघुवित्त वित्तीय संस्थाले ‘‘बिपन्न समुदायका निम्ति आशा‘‘भन्ने मुल नाराका साथ ककनी – ६ नुवाकोटमा केन्द्रीय कार्यालय स्थापना गरी २०७३ भाद्र १५ गतेबाट कारोबार शुरु गरेको हो ।हालसम्म वित्तीय संस्थाले २९वटा जिल्लाहरुका५५ शाखा कार्यालयहरु मार्फत करीब ५२हजार भन्दा बढी सदस्यहरुलाई वित्तीय सेवा उपलब्ध गराउदै आएको छ । संस्थाको हालसम्म करीब रु. २ अर्ब १८ करोड कर्जा लगानीमा रहेको तथा सदस्यहरुबाट ६३करोड भन्दा बढी निक्षेप संकलन गरेको छ ।