असार १ गतेसम्म कायम सेयरधनीले मात्रै गुडविल फाइनान्सले निष्काशन गर्न लागेको हकप्रद सेयर भर्न पाउने भएका छन् । फाइनान्सले हकप्रद प्रयोजनका लागि असार २ गतेदेखि सेयरधनीले पुस्तिका बन्द गर्ने निर्णय गरेको हो ।
गुडविलले १० बराबर छ को अनुपातमा हकप्रद सेयर निष्काशन गर्न लागेको हो । हकप्रद निष्काशनका लागि कम्पनीले गत वैशाख २१ गते नेपाल धितोपत्र बोर्डबाट अनुमति पाएको थियो ।
गुडविल फाइनान्सले एक सय रुपैयाँ अंकित मूल्यमा २७ करोड २२ लाख ५० हजार रुपैयाँ बराबरको २७ लाख २२ हजार पाँच सय कित्ता हकप्रद सेयर निष्काशन गर्नेछ । हकप्रद निष्काशनका लागि गुडविलले एनआईबिएल क्यापिटल मार्केट लिमिटेडलाई सेयर निष्काशन तथा विक्री प्रबन्धकमा नियुक्त गरेको छ ।
गत आर्थिक वर्षको कमाईबाट २५ प्रतिशत बोनस सेयर वितरण गरेर गुडविलले ४५ करोड ३७ लाख रुपैयाँ चुक्तापुँजी पुर्याएको छ । ६० प्रतिशत हकप्रद सेयर जारी गरेपछि फाइनान्सको चुक्तापुँजी ७२ करोड ६० लाख रुपैयाँ पुग्नेछ ।
