साताको अन्तिम दिन सेयर बजार ३.८० अंकले घटेर १६०४.३१ अंकमा कायम भएको छ । उत्पादनमूलक र जलविद्युत्बाहेक कारोबार भएका सबै समूह घटेका छन् । सबैभन्दा धेरै होटल समूह २५.३२ अंकले घटेको छ । बैंकिङ, विकास बैंक, फाइनान्स, बीमा र अन्य क्रमशः १.७५, ९.९५, ३.८, १०.४९ र ८.९६ अंकले घटेका छन् । उत्पादनमूलक र जलविद्युत् भने क्रमशः १९.१६ र ७.०४ अंकले बढेका छन् ।
दिनभरिमा १४७ वटा कम्पनीको ११ लाख ९२ हजार नौ सय ५८ कित्ता सेयर छ हजार तीन सय ३३ पटक खरिदविक्री हुँदा ६४ करोड ९१ लाख सात हजार चार सय ४६ रुपैयाँ पुँजी परिचालन भएको छ । जसमध्ये, एसियन लाइफ इन्स्योरेन्सको छ करोड २३ लाख रुपैयाँ बराबरको प्रोमोटर सेयरको कारोबार भएको छ । स्टान्डर्ड चार्टर्ड बैंकको झन्डै साढे तीन करोडको कारोबार हुँदा गुराँस लाइफ इन्स्योरेन्स, हिमालयन जनलि इन्स्योरेन्स, बैंक अफ काठमाण्डू र ग्लोबल आईएमई बैंकको दुई करोडमाथिको कारोबार हुँदा प्राइम कमर्सियल बैंक, नेपाल इन्भेष्टमेन्ट बैंक, नेपाल लाइफ इन्स्योरेन्स, नविल बैंक लगायतको एक करोडमाथिको कारोबार भएको छ ।
युनाइटेड मोदीका सेयरधनीले विहीबार सबैभन्दा धेरै ९.९७ प्रतिशतका दरले आफ्नो सम्पत्ति बढाएका छन् भने कर्णाली डेभलपमेन्ट बैंक, रिलायन्स फाइनान्स र हिमालयन डिस्टीलरीका सेयरधनीले क्रमशः ८.७१, ८.०२ र ५.४७ प्रतिशतका दरले कमाएका छन् । सहारा विकास बैंक, ग्रीन डेभलपमेन्ट बैंक, आरएसडीसी लघुवित्त, युनाइटेड फाइनान्स, जानकी फाइनान्स, राष्ट्रिय बीमा कम्पनी प्रोमोटर लगायतका सेयरधनीले पनि कमाएका छन् ।
गुमाउने कम्पनीहरुको अग्रस्थानमा रहेको श्री इन्भेष्टमेन्ट फाइनान्सका सेयरधनीले ५.०८ प्रतिशतका दरले आफ्नो सम्पत्ति घटाउँदा पूर्णिमा विकास बैंकका सेयरधनीले ५.०४ प्रतिशतले गुमाएका छन् । सिनर्जी फाइनान्स, सिनर्जी पावर, सिर्जना फाइनान्स, सिभिल लघुवित्त, बुटवल पावर कम्पनी, अरुण भ्याली हाइड्रो, नेरुडे लघुवित्त, मञ्जुश्री फाइनान्स लगायतका सेयरधनीले पनि गुमाएका छन् ।
