आइतबार सेयर बजार ४७.७९ अंकले बढेर १५३३.८३ अंकमा पुग्दा तीन कम्पनीका सेयरधनीले गुमाएका छन् । सप्तकोशी डेभलपमेन्ट बैंक, सहारा विकास बैंक र प्रभु इन्स्योरेन्स (प्रोमोटर)का सेयरधनीले क्रमशः ३.६०६६, १.९८६८ र १.९५७३ प्रतिशतका दरले आफ्नो सम्पत्ति घटाएका हुन् ।
यता हाम्रो विकास बैंक, लक्ष्मी लघुवित्त र जनउत्थान सामुदायिक लघुवित्तका सेयरधनीले १० प्रतिशतका दरले आफ्नो सम्पत्ति बढाएका छन् भने कृषि विकास बैंक र मिर्मिरे माइक्रोफाइनान्सका सेयरधनीले ९.९८ प्रतिशतका दरले कमाएका छन् । नेपाल ग्रामीण विकास बैंक र महिला सहयात्रा माइक्रोफाइनान्सका सेयरधनीले ९.९६ प्रतिशतका दरले कमाएका छन् । एनबि इन्स्योरेन्स, चिलिमे हाइड्रो, मिथिला लघुवित्त, रिलायन्स फाइनान्स, बरुण हाइड्रो, अपि पावर कम्पनी, गुडविल फाइनान्स, फस्र्ट माइक्रोफाइनान्स, सेती फाइनान्स, भार्गव विकास बैंक, बुटवल पावर कम्पनी, माउन्ट मकालु डेभलपमेन्ट बैंक र आईएलएफसीओ माइक्रोफाइनान्सका सेयरधनीले ९ प्रतिशतभन्दा बढीका दरले कमाएका छन् ।
आइतबार कारोबार भएका सबै समूह बढेका छन् । सबैभन्दा धेरै बीमा समूह २०३.३७ अंकले बढेको छ । बैंकिङ, होटल, विकास बैंक, जलविद्युत्, फाइनान्स र अन्य क्रमशः ४४.४१, ९६.४५, ६०.९७, १५९.४, २४.७ र ६.६५ अंकले बढेका छन् । परिसूचक बढेपछि कारोबार रकममा पनि उल्लेख्य वृद्धि देखिएको छ । दिनभरिमा १४३ वटा कम्पनीको ३६ लाख ५७ हजार एक सय २२ कित्ता सेयर १० हजार पाँच सय ५८ पटक खरिदविक्री हुँदा कुल एक अर्ब ७६ करोड एक लाख २५ हजार छ सय ५५ रुपैयाँको कारोबार भएको छ ।
सेयर कारोबारका आधारमा आइतबार प्रभु इन्स्योरेन्सको प्रोमोटर सेयर अग्रस्थानमा छ, जसको १९ करोड २८ लाख ५० हजार रुपैयाँको कारोबार भएको छ । एनसीसी बैंकको झन्डै पौने १० करोडको कारोबार भएको छ भने नेशनल हाइड्रोको आठ करोड र सानिमा बैंकको छ करोडमाथिको कारोबार भएको छ । नेपाल बंगलादेश बैंक, लक्ष्मी बैंक र नेपाल इन्भेष्टमेन्ट बैंकको पाँच करोडमाथिको कारोबार भएको छ भने कृषि विकास बैंक, नेशनल लाइफ इन्स्योरेन्स, नेपाल बैंक लगायतको चार करोड ७० लाखमाथिको कारोबार भएको छ ।
