Banking Khabar
ट्रेन्डिङ: वित्तीय अपराध जेन्जी पुस्ता अन्तर्राष्ट्रिय बैंकिङ भारतीय बैंकिङ हाइलाइट राष्ट्र बंक बैंक-वित्त इन्स्योरेन्स
वित्तीय अपराध

एकान्तकुनाबाट १ करोड ६७ लाख रुपैयाँ बरामद, हुण्डीको आशंकामा तीन जना पक्राउ

२०८३ मंसिर १ गते

बैंकिङ खबर /  ललितपुरको एकान्तकुनामा ठूलो परिमाणको नगदसहित तीन जना पक्राउ परेका छन् । काठमाडौं उपत्यका अपराध अनुसन्धान कार्यालयको टोलीले हुण्डी कारोबारमा संलग्न रहेको आशंकामा उनीहरूलाई १ करोड ६७ लाख रुपैयाँसहित नियन्त्रणमा लिएको हो ।

प्रहरीले एकान्तकुना क्षेत्रमा गरेको अनुसन्धान तथा कारबाहीका क्रममा उक्त रकम बरामद गरेको जनाएको छ । पक्राउ पर्नेमा भोजपुर नगरपालिका-३ का ३० वर्षीय दीपक खड्का, ललितपुरको गोदावरी नगरपालिका-१० का ३२ वर्षीय जयराम केसी र काठमाडौंको बानेश्वरका प्रज्वल रिजाल रहेका छन् ।

प्रहरीका अनुसार पक्राउ परेका व्यक्तिहरूमाथि औपचारिक वित्तीय प्रणालीबाहिर हुण्डीमार्फत रकम ओसारपसार तथा लेनदेन गरेको आशंकामा अनुसन्धान भइरहेको छ । उनीहरूलाई बरामद नगदसहित थप अनुसन्धान र कानुनी प्रक्रियाका लागि जिल्ला प्रहरी परिसर भद्रकाली पठाइएको छ ।

काठमाडौं उपत्यका अपराध अनुसन्धान कार्यालयका प्रवक्ता प्रहरी उपरीक्षक रामेश्वर कार्कीले घटनाबारे थप अनुसन्धान भइरहेको जानकारी दिएका छन् ।

हुण्डी कारोबार औपचारिक बैंकिङ तथा वित्तीय प्रणालीबाहिर रकम स्थानान्तरण गर्ने अनौपचारिक माध्यम हो । यस्तो कारोबारले वित्तीय पारदर्शिता कमजोर बनाउनुका साथै सम्पत्ति शुद्धीकरण नियन्त्रण र अवैध वित्तीय गतिविधिको निगरानीमा चुनौती सिर्जना गर्न सक्छ ।

यद्यपि, बरामद रकमको स्रोत, त्यसको प्रयोजन तथा पक्राउ परेका व्यक्तिहरूको वास्तविक संलग्नताबारे अनुसन्धानबाट थप विवरण खुल्न बाँकी छ । पक्राउ पर्नु मात्रै कसुर प्रमाणित हुनु होइन ।

Ad