बैंकिङ खबर / एनआइसी एसिया बैंक लिमिटेडले ५० प्रतिशत हकप्रद सेयर निष्कासन गर्ने अनुमति पाएको छ । नेपाल धितोपत्र बोर्ड (सेबोन) ले बैंकको हकप्रद सेयर निष्कासनसम्बन्धी प्रस्ताव स्वीकृत गरेसँगै बैंकलाई थप पुँजी जुटाउने बाटो खुलेको हो ।
बोर्डले २०८३ कात्तिक १७ गते बैंकको हकप्रद सेयर निष्कासन प्रस्तावलाई स्वीकृति दिएको हो । स्वीकृत प्रस्तावअनुसार बैंकले हाल कायम चुक्ता पुँजीको ५० प्रतिशत अर्थात् १ः०.५० अनुपातमा हकप्रद सेयर जारी गर्नेछ ।
यसअनुसार बैंकले प्रतिकित्ता १०० रुपैयाँ अंकित मूल्यका कुल ७ करोड ४५ लाख ८७ हजार ८३५ कित्ता हकप्रद सेयर निष्कासन गर्नेछ । उक्त सेयर बिक्रीबाट बैंकले ७ अर्ब ४५ करोड ८७ लाख ८३ हजार ५०० रुपैयाँ पुँजी जुटाउनेछ ।
हकप्रद सेयर निष्कासनपछि बैंकको पुँजी आधार थप विस्तार हुनेछ । यसबाट बैंकलाई पुँजीगत आवश्यकता व्यवस्थापन गर्न सहयोग पुग्ने अपेक्षा गरिएको छ ।
बैंकको हकप्रद सेयर निष्कासन तथा बिक्री व्यवस्थापनको जिम्मेवारी एनआइएमबी एस क्यापिटल लिमिटेडले पाएको छ ।
सेबोनबाट निष्कासन अनुमति प्राप्त भए पनि हकप्रद सेयरका लागि आवेदन खुल्ने मिति, सेयरधनी दर्ता पुस्तिका बन्द हुने मिति तथा अन्य निष्कासन प्रक्रिया सम्बन्धी विवरण भने बैंकले पछि सार्वजनिक गर्नेछ ।
