बैंकहरुको खराब कर्जा बढ्यो, कुनको कति ?

बैंकिङ खबर/चालु आर्थिक वर्ष २०८१/८२ को तेस्रो त्रैमास (चैत मसान्त) सम्म वाणिज्य बैंकहरूको खराब कर्जा औसत ४.८३ प्रतिशत कायम भएको छ । गत आर्थिक वर्ष ०८०/८१ को चैत मसान्तसम्म वाणिज्य बैंकहरूको खराब कर्जा औसत ३.६५ प्रतिशत थियो ।

आर्थिक वर्ष ०८०/८१ चैतसम्मको तुलनामा यो वर्ष १.१८ प्रतिशत विन्दुले खराब कर्जा बढेको छ । अर्थतन्त्रमा देखिएको दबाब, नयाँ कर्जा लगानी नबढ्नु, गैरबैंकिङ सम्पत्ति बिक्रीमा भएको ढिलाइ र बैंकहरूबीच बढ्दो प्रतिस्पर्धाका कारण वाणिज्य बैंकहरूको खराब कर्जा बढेको बताइएको छ ।

चालु आर्थिक वर्षको चैतसम्म अधिकांश वाणिज्य बैंकको खराब कर्जा चार प्रतिशतभन्दा माथि छ । जसमा नौ बैंकको खराब कर्जा पाँच प्रतिशतभन्दा बढी छ । खराब कर्जा पाँच प्रतिशतभन्दा बढी हुनेमा हिमालयन, कुमारी, नेपाल इन्भेस्टमेन्ट मेगा, लक्ष्मी सन्‌राइज, एनआईसी एसिया, सिटिजन्स इन्टरनेसनल, प्राइम कमर्सियल, नेपाल र प्रभु बैंक छन् ।

हिमालयन बैंकको खराब कर्जा ७.६८ प्रतिशत छ । गत वर्षको तेस्रो त्रैमासको तुलनामा यस बैंकको खराब कर्जा २.७२ प्रतिशत विन्दुले बढेको हो । सबैभन्दा कम खराब कर्जा एभरेस्ट र स्ट्यान्डर्ड चार्टर्ड बैंकको छ । यी दुई बैंकको खराब कर्जा गत वर्षको चैतको तुलनामा घटेको हो । स्ट्यान्डर्ड चार्टर्ड बैंकको खराब कर्जा गत वर्षको चैतसम्मको तुलनामा ०.७ प्रतिशत विन्दुले घटेको छ । त्यस्तै, एभरेस्ट बैंकको खराब कर्जा ०.०६ प्रतिशत विन्दुले घटेको छ ।