बैंकिङ खबर/ इन्द्रेणी मसरुम फर्मले सर्वसाधारणहरुमा प्राथमिक शेयर निष्काशन गर्ने योजना बनाएको छ । नेपालको अर्थतन्त्रको प्रमुख आधार मानिएको कृषि क्षेत्रमा क्रान्ति तथा देशको समग्र कृषि क्षेत्रको दिगो विकासमा टेवा पुर् याउने उद्देश्यले च्याउ खेतीसँग सम्बन्धित केही सफल व्यवसायिक व्यक्तिहरुको लगानीमा मकवानपुर जिल्लाको थाहा नगरपालिका, वडा नं. ९, चित्लाङ्गमा नेपालमै पहिलो पटक अत्याधुनिक प्रविधिबाट व्यवसायिक रुपमा गोब्रे च्याऊ उत्पादन गर्ने उद्देश्यले वि.सं. २०७१ सालमा इन्द्रेणी मसरुम फर्म पब्लिक लिमिटेडको नाममा कम्पनी स्थापना भएको हो ।
नेपालमा छरिएर रहेको कृषि व्यवसाय अन्तर्गत च्याउ उत्पादनमा रहेको अवसर र चुनौतीहरुलाई एकीकृत गरी संस्थागत व्यवस्थापनको माध्यमबाट मर्यादित र प्रतिस्पर्धी बनाइ युवाहरुको आकर्षणको केन्द्रविन्दु बनाउन र कृषि क्षेत्रको दिगो विकासमा टेवा पु¥याउने उद्देश्य अनुसार काम तथा सोसँग सम्बन्धित क्रियाकलापहरु गरिरहेको छ ।
हाल व्यवसायिक रुपमा ५ प्रजातिको च्याउ खेती भईरहेको छ गोब्रे ओइस्टर, शिताके, किङ्ग ओयष्टर, गानोडर्मा तीमध्ये गोब्रे च्याउ सबैभन्दा लोकप्रिय छ, जसले देशको कुल च्याउ उत्पादनको ४५% ओगटेको छ ।
उक्त बजारलाई मध्यनजर गर्दै यसबाट स्वास्थ्यलाई हुन सक्ने असंख्य लाभहरु तथा आर्थिक लाभ समेत लिन सक्ने भएकाले गोब्रे च्याउ उत्पादन गर्न कम्पनी स्थापित भएको थियो ।
देशमा बढ्दो बेरोजगारी र वैदेशिक रोजगारीमा युवा जनशक्ति पलायन हुने क्रममा यस इन्द्रेणी मुसरुम फर्मले प्रत्यक्ष तथा उप्रत्यक्ष रुपमा स्थानीय वासिन्दाहरुलाई रोजगारी तथा तीनका घर परिवारहरुलाई जीविकोपार्जन गरिरहेका छन् ।
हाल यस संस्थामा विभिन्न व्यवसायिक क्षेत्रका शेयरधनीहरुबाट १४ करोड लगानी जम्मा गरी चित्लाङ्गको १९ रोपनी जग्गामा ११ ओटा अत्याधुनिक उत्पादन कक्ष निर्माण गरी प्रत्येक दिन ६०० के.जी. गोब्रे च्याउ उत्पादन गर्दै आइरहेको छ ।
बजारमा हुने प्रति दिन १५ हजार के. जी. को माग आपूर्तिमा सहज पुग्ने गरी उत्पादन वृद्धि गर्न सर्वसाधारणहरुको तर्फबाट सहभागिता बढाउन रहेको अध्यक्ष धर्मेन्द्र महर्जनको भनाइ छ ।
निकट भविष्यमा यस कम्पनीले शेयर निष्काशन गरी सो बाट प्राप्त हुने रकमबाट मकवानपुर जिल्लाको हेटौंडाबाट पनि व्यवसायिक रुपमा विभिन्न प्रजातिको च्याउ उत्पादन शुरु गर्नुका साथै कोल्ड स्टोरको निर्माण गर्ने, प्रयोगशाला निर्माण गर्ने, च्याउ उत्पादन निमित्त मल बिउ र सामग्री बिक्रि केन्द्र खोली बिक्री गर्ने, च्याउको सुकुटी, गुन्द्रुक, अचार तथा सूप उत्पादन गर्ने लक्ष्य लिएको अध्यक्ष महर्जनले बताए ।
चित्लाङ्ग र हेटौडाबाट उत्पादन शुरू भए पश्चात् दैनिक २,५०० के.जी. माथि च्याउ उत्पादन गर्ने योजना रहेको र यसले उत्पादनको लागतमा समेत कमी हुन आउने उनको भनाइ छ ।
यस कम्पनीले व्यवसायिक रुपमा च्याउ उत्पादन गरे देखिनै नेपालको जिडिपी(कुल ग्रहयस्थ उत्पादन) र जिएनपी(कुल राष्ट्रिय उत्पादन) मा टेवा पुर्याइरहेकोमा नेपाल सरकारबाट उचित अनुदान समयमा नपाउनु, बेला बखतमा कच्चा पदार्थ र मल नपाउनुका साथै छिमेकि देशहरुबाट लुकाई छिपाई नेपालमा भित्रिने च्याउ नै बजारको प्रमुख चुनौतीको रुपमा रहेको कम्पनीका अध्यक्षको भनाई छ ।
