शाइन रेसुङ्गा डेभलपमेन्ट बैंक लिमिटेडले चालु आर्थिक वर्षको पहिलो त्रैमासमा ७ करोड ७८ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा ४६ दशमलव ८४ प्रतिशत बढी नाफा कमाएको हो । गत आर्थिक वर्षको पहिलो तीन महिनामा बैंकले ४ करोड ६२ लाख रुपैयाँ मुनाफा आर्जन गरेको थियो ।
१ अर्ब १० करोड २८ लाख रुपैयाँ चुक्ता पुँजी भएको शाइन रेसुंगाको खुद ब्याज आम्दानी ५१ दशमलव ७६ प्रतिशतले बढेर १३ करोड ५० लाख रुपैयाँ पुगेको छ । त्यस्तै, यो अवधिमा बैंकको संचालन मुनाफा पनि ४२ दशमलव ७८ प्रतिशतले बढेर १० करोड २८ लाख रुपैयाँ पुगेको छ ।
यो अवधिमा बैंकले निक्षेपमा ४१ दशमलव १५ प्रतिशतले वृद्धि गरी ९ अर्ब ५ करोड ३३ लाख रुपैयाँ संकलन गरेको छ । जसबाट बैंकले कर्जातर्फ ८ अर्ब २ करोड ५२ लाख रुपैयाँ लगानी गरेको छ ।
जगेडा कोषमा २६ करोड २९ लाख रुपैयाँ राखेको बैंकले प्रोभिजनमा ८५ लाख रुपैयाँ राखेको छ । यो तीन महिनामा बैंकले ३२ लाख रुपैयाँ खराबकर्जा उठाएको छ । हाल बैंकसँग शुन्य दशमलव २४ प्रतिशत निष्कृय कर्जा र १४ दशमलव ८१ प्रतिशत जोखिम युक्त सम्पत्ति रहेको छ ।
बैंकको प्रति शेयर आम्दानी २४ दशमलव ६२ रुपैयाँ, प्रति शेयर नेटवर्थ १ सय २३ दशमलव ८४ रुपैयाँ, तरलता अनुपात २५ दशमलव ४४ प्रतिशत र मुल्य आम्दानीको अनुपात २६ दशमलव १२ गुणा रहेको छ ।
