आठ वाणिज्य बैंकसहित ३३ वित्तीय कम्पनीको सेयर कारोबार रोक्का

२०७९ कार्तिक ४ गते

बैंकिङ खबर/नेपाल स्टक एक्सचेन्ज (नेप्से) मा तीन दर्जनभन्दा बढी वित्तीय कम्पनीको सेयर कारोबार रोक्कामा छ । मर्जर तथा एक्विजिसनका कारण वाणिज्य बैंक, लघुवित्त कम्पनी र बिमा कम्पनीको गरी ३३ कम्पनीको सेयर कारोबार रोक्कामा राखिएको हो ।

जसमध्ये आठ वटा वाणिज्य बैंकसहित नौ वटा लघुवित्त कम्पनी तथा १६ वटा बिमा कम्पनी रहेका छन् । सानिमा जनरल इन्स्योरेन्स र जनरल इन्स्योरेन्सले भने कात्तिक ७ गतेदेखि एकीकृत कारोबार सुरु गर्ने तयारी गरेका छन् । यी दुई कम्पनीबीच असार २९ गते मर्जरमा जाने सहमतिपत्रमा हस्ताक्षर भएको थियो । असोज ११ गतेसम्पन्न यी दुई कम्पनीको विशेष साधारणसभाले एक आपसमा मर्जर हुने प्रस्ताव गरेका थिए ।

त्यस्तै, समाज लघुवित्त र घोडिघोडा लघुवित्तको सेयर कारोबार त ०७७ असोजदेखि नै रोक्कामा छ । यी दुई कम्पनीले आईपीओ नै निष्कासन नगरेका कम्पनीसँग मर्जर गर्ने सम्झौता गरेका छन् । आईपीओ निष्कासन नगरेका कम्पनीहरूसँग मर्जर सम्झौता गरेका समाज र घोडिघोडा लघुवित्तको सेयर कारोबार हालसम्म पनि रोक्कामा रहेको छ ।

समाज लघुवित्त स्वस्तिक लघुवित्तसँग मर्जरमा जाने सम्झौता ०७७ असोज ५ गते भएको थियो । घोडिघोडा लघुवित्त वित्तीय संस्था र युनिक लघुवित्त वित्तीय संस्था एक आपसमा मर्जरमा जाने सम्झौता ०७७ कात्तिक २१ गते भएको थियो । यी कम्पनी एक आपसमा मर्जर भएर २०७८ पुस ३० गते एकीकृत कारोबार भइसकेको छ । धितोपत्र दोस्रो बजारमा सूचीकृत नभएका कम्पनीसँग मर्जर हुने निर्णयले लगानीकर्ताको सम्पत्ति दुई वर्षदेखि बन्धकमा छ ।