कुन बैंकको सीडी रेसियो कति ? (सूचीसहित)

बैंकिङ खबर/ निक्षेप घट्दा तीन वाणिज्य बैंकको कर्जा निक्षेप अनुपात (सीडी रेसियो) ले ९० प्रतिशतको सीमा नाघेको छ । पुँजी कोषबाहेकको ऋणपत्र तथा सापटी र निक्षेप समेत जोडेर आउने कुल रकममा ९० प्रतिशत मात्रै बैंकहरुले कर्जा दिन पाउँछन् ।

अर्को अर्थमा सीडी रेसियो ९० प्रतिशत नाघ्नु भनेको ती बैंकले थप कर्जा दिन नसक्ने अवस्था रहनु हो । साउन महिनामा मात्रै बैंकहरुबाट १ खर्ब ७ अर्ब रुपैयाँ निक्षेप बाहिरिएको छ ।

असार मसान्तसम्म कुल ४५ खर्ब ४१ अर्ब रुपैयाँ निक्षेप संकलन भएकोमा साउन मसान्तसम्म आउँदा ४४ खर्ब ३४ अर्बमा झरेको छ । जसले गर्दा बैंकहरूको सीडी रेसियोमा दवाव परेको छ ।

मौद्रिक व्यवस्थाअनुसार यो सीमा ९० प्रतिशत नाघेमा राष्ट्र बैंकले कारबाही गर्दछ । साउन महिनाको अन्त्यसम्म तीन बैंक नबिल, नेपाल र सेन्चुरी कमर्सियलको सीडी रेसियो भने ९० नाघेको छ ।

नेपाल बैंकर्स एसोसिएसनको तथ्यांकअनुसार सेन्चुरीको ९१.६३, नबिलको ९०.९२ र नेपाल बैंकको ९०.७२ छ । समग्रमा वाणिज्य बैंकहरुको औसत सीडी रेसियो ८८.०७ प्रतिशत छ । असार मसान्तसम्म यस्तो रेसियो ८६.२२ प्रतिशत थियो ।

कर्जा निक्षेप अनुपात सूची

स्रोत: नेपाल बैंकर्स एसोसिएसन