बैंकिङ खबर । अनलाइन ट्रेडिङ सिस्टममा सुधार नभएको भन्दै सोमबार लगानीकर्ताहरुले नेपाल स्टक एक्सचेञ्ज (नेप्से)को कार्यालय घेराउ गरेका छन् । नेपाल इन्भेष्टर्स फोरम, शेयर लगानीकर्ता संघ नेपाल, नेपाल पूँजीबजार लगानीकर्ता संघ र नेपाल पूँजीबजार संघले संयुक्त रुपमा नेप्से कार्यालय घेराउ गरेका हुन् ।
महँगोमा प्रणाली ल्याए पनि त्यसले काम नगरेको लगानीकर्ताहरुको भनाई छ । उनीहरुले समस्या सामाधान नभएसम्म आन्दोलनको कार्यक्रम जारी राख्ने बताएका छन् ।
नेप्सेले भने समस्याको समाधान भइसकेको बताएका छन् । आन्दोलनरत लगानीकर्ताहरुलाई सम्बोधन गर्दै नेप्सेका महाप्रबन्धक चन्द्रसिंह साउदले हार्डवेयरको समस्याका कारण कारोबारमा असहजता आएको र अहिले सो समस्या नरहेको बताएका छन् ।
सेयरको दोस्रो बजारमा पनि प्रविधिको विकास गरी सेयर खरिदविक्रीका लागि ब्रोकर अफिस धाउनुपर्ने बाध्यता हटाउन २० दिन अघि अनलाइन ट्रेडिङ सिस्टमको पूर्ण सुरुवात गरिएको थियो । यद्यपि, उक्त प्रणालीमा समस्या आउँदा सेयर कारोबार नै प्रभावित बन्न पुगेको छ । यसै कुरालाई लिएर आक्रोशित बनेका लगानीकर्ताले आफूहरु कारोबारबाट नै बञ्चित हुनुपरेको गुनासो पोखेका छन् ।
