निर्धन उत्थान बैंक लिमिटेडले आफना ग्राहक सदस्यहरुको सहभागितामा तीन दिने “ग्राहक सदस्यहरुको लागि सफा दूग्ध उत्पादन तथा विविधिकरण तालिम संचालन गरेको छ । पुस १६ गते आइतबारदेखि बीरगञ्जमा सुरु भएको तालिम १८ गते मंगलबारसम्म चल्नेछ । तालिममा पर्सा जिल्लाका परवानीपूर शाखा र बिरगंज शाखा तथा बारा जिल्लाका प्रसौनी शाखा र कलैया शाखाका २५ जना ग्राहक सदस्य तथा अभिभावकहरु सहभागी छन् । बैंकले आफनो ग्राहक सदस्यहरुको सहभागितामा सफा दूग्ध उत्पादन तथा विविधिकरण तालिम संचालन गरेको बैंकका बिरगंज क्षेत्रीय कार्यालयका क्षेत्रीय प्रमूख श्री बिष्णू प्रसाद पराजूलीले बताए ।
तालिमका प्रशिक्षक डा. ईन्द्र नारायण शाहले दूधको बनावट, चारित्रिक गूण तथा यसको महत्वका बारेमा बताए । सफा दूग्ध उत्पादन र दूधको गूणस्तर परीक्षण गर्ने विधिहरु, दूधको उत्पादन लागत घटाउने उपायहरु, दूध तथा दूग्ध पदार्थको न्युनतम गूणस्तरका बारे उनले जानकारी गराए । त्यस्तै, सफा दूग्ध उत्पादनमा डेरी उपकरणको सरसफाईको महत्व, क्रिम सेपरेसन बारेमा पनि उनले जानकारी दिए भने पाश्चूराईजेशन, ब्याच पाश्चूराईजेशन र प्याकेजिङ्ग, मख्खन, नौनी, बटर र घिउ उत्पादन विधि, दूध तथा दूग्ध पदार्थको भण्डारण, विभिन्न क्षमताका दूग्ध ब्यवसायको लागि आवश्यक मेशिनरी, औजार तथा लागत मुल्य, खूवा र आईस क्रिम उत्पादन प्रविधि, लस्सी उत्पादन प्रविधि, जिरा मोही बनाउने विधि, गुदपाक उत्पादन प्रविधि र पूष्टकारी उत्पादन प्रविधि, बचतको महत्व तथा बैंकको पब्लिक डिपोजिट लगायतका विषयमा डा. शाहले प्रशिक्षण दिए ।
