चालू आर्थिक वर्षको दोस्रो त्रैमासमा कृषि विकास बैंक लिमिटेडले ९० करोड ६६ लाख ८९ हजार रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलना १३३.९६ प्रतिशत बढी नाफा कमाएको हो । गत आर्थिक वर्षको दोस्रो त्रैमासमा कृषि विकास बैंकले जम्मा ३८ करोड ७५ लाख २९ हजार मुनाफा आर्जन गरेको थियो ।
बैंकले सञ्चालन मुनाफामा १६१.५३ र खुद व्याज आम्दानीमा ५६.१९ प्रतिशतको वृद्धि हासिल गरेको छ । जसअनुसार, बैंकको सञ्चालन मुनाफा २६ करोड रुपैयाँबाट बढेर ६८ करोड रुपैयाँ पुगेको छ भने खुद व्याज आम्दानी एक अर्ब ९९ करोड १० लाख ३५ हजार रुपैयाँबाट बढेर तीन अर्ब १० करोड ९८ लाख २२ हजार रुपैयाँ पुगेको छ ।
यो अवधिमा बैंकले ८७ अर्ब ६५ करोड रुपैयाँ निक्षेप संकलन गरी ८७ अर्ब पाँच करोड रुपैयाँ कर्जा लगानी गरेको छ । बैंकले निक्षेप संलन गर कर्जा लगानीमा क्रमशः ६.८९ र २८.८२ प्रतिशत वृद्धि हासिल गरेको हो । गत आर्थिक वर्षको पहिलो छ महिनामा कृषि विकास बैंकले ८२ अर्ब ५४ करोड रुपैयाँ निक्षेप संकलन गरी ६७ अर्ब ५७ करोड रुपैयाँ कर्जा लगानी गरेको थियो । जसअनुसार बैंकको कर्जा निक्षेप अनुपात ८२.९७ प्रतिशत रहेको देखिन्छ ।
यो अवधिमा कृषि विकास बैंकले चुक्तापुँजी ४४.४४ प्रतिशत प्रगति गर्दै चार अर्ब ९४ करोड रुपैयाँ पुर्याएको छ । गत आर्थिक वर्षको पुस मसान्तमा बैंकको चुक्तापुँजी तीन अर्ब ४२ करोड रुपैयाँ रहेको थियो । निष्कृय कर्जा ५.३६ प्रतिशतबाट घटेर ३.८२ प्रतिशत कायम भएको बैंकले जगेडाकोषमा नौ अर्ब २९ करोड रुपैयाँ रहेको छ भने प्रोभिजनमा ८६ करोड रुपैयाँ रहेको छ । यो अवधिमा बैंकले ६५ करोड ४० लाख ५० हजार रुपैयाँ खराबकर्जा उठाएको छ । बैंकको प्रतिसेयर आम्दानी २९ रुपैयाँ ४९ पैसा र प्रतिसेयर नेटवर्थ दुई सय ८४ रुपैयाँ ४३ पैसा रहेको छ ।
