महालक्ष्मी विकास बैंक लिमिटेडले चालू आर्थिक वर्षको दोस्रो त्रैमासमा १२ करोड ८७ लाख २४ हजार रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा दुई गुणा बढी नाफा कमाएको हो । गत आर्थिक वर्षको दोस्रो त्रैमासमा चार करोड ९८ लाख ५४ हजार रुपैयाँ मुनाफा आर्जन गरेको थियो ।
गत आर्थिक वर्षको तुलनामा चार गुणा बढाएर एक अर्ब १५ करोड ६२ लाख २३ हजार रुपैयाँ चुक्तापुँजी पुर्याएको बैंकको सञ्चालन मुनाफा साढे ३ गुणाले बढेर २० करोड ७ लाख ७२ हजार रुपैयाँ पुगेको छ भने खुद ब्याज आम्दानी झन्डै साढे ३ गुणा बढेर ३० करोड ९८ लाख ३२ हजार रुपैयाँ पुगेको छ । यो अवधिमा बैंकले ११ अर्ब ७८ करोड ३३ लाख १८ हजार रुपैयाँ निक्षेप संकलन गरी नौ अर्ब ८८ करोड नौ लाख तीन हजार रुपैयाँ कर्जा लगानी गरेको छ । बैंकको निक्षेप संकलन र कर्जा लगानी गत आर्थिक वर्षको दोस्रो त्रैमासको तुलनामा क्रमशः तीन गुणा र झन्डै चार गुणाले वृद्धि भएको हो ।
यो अवधिमा बैंकको कुल सम्पति तीन गुणाभन्दा बढीले बढेर १४ अर्ब १७ करोड ८९ लाख रुपैयाँ पुगेको छ । निष्कृय कर्जा दुई दशमलव ५१ प्रतिशतबाट बढेर चार दशमलव ४१ प्रतिशत पुगेको बैंकले जगेडा कोषलाई चार गुणा बढाएर ७० करोड २७ लाख ८७ हजार रुपैयाँ पुर्याएको छ । बैंकको प्रतिसेयर आम्दानी २२ रुपैयाँ २६ पैसा, मूल्य आम्दानी अनुपात १२.५८, पुँजीकोष अनुपात १६.९९, प्रतिसेयर कुल सम्पत्तिको मूल्य एक हजार दुई सय २६ रुपैयाँ ३१ पैसा, तरलता अनुपात ३२.०४ प्रतिशत र प्रतिसेयर नेटवर्थ एक सय ६० रुपैयाँ ७८ पैसा रहेको छ ।
