कुमारी बैंक लिमिटेडले चार वटा वित्तीय संस्थालाई एक्वायर गर्ने प्रक्रियालाई तीव्र रुपले अघि बढाएको छ । काष्ठमण्डप डेभलपमेन्ट बैंक लिमिटेड, पश्चिमाञ्चल फाइनान्स कम्पनी लिमिटेड, महाकाली विकास बैंक लिमिटेड र काँक्रेबिहार विकास बैंक लिमिटेडलाई एक्वायर गर्न नेपाल राष्ट्र बैंकबाट सैद्धान्तिक सहमति पाइसकेको बैंकले एक्विजिसनका लागि स्वाप रेसियो तोकेको छ । बैंकहरुको डिडिए मूल्याङ्कनबाट आएको सेयर स्वाप अनुपात संयुक्त प्राप्ति समितिको बैठकमा छलफल गरी चार वटै सस्थालाई प्रति सेयर रु.८५ को दरले एक्वायर गर्ने निर्णय भएको बैंकले जनाएको छ ।
एनसीसी बैंकसँगको मर्जर तोडिएपछि कुमारीले आफै चुक्ता पूँजी पुर्याउन भन्दै यसअघि ५० प्रतिशत हकप्रद जारी गर्ने घोषणा गरिसकेको छ । हाल कुमारीको दुई अर्ब ६९ करोड रुपैंया चुक्ता पूँजी रहेको छ । हकप्रद निष्काशनपछि बैंकको पुँजी चार अर्ब हाराहारीमा पुग्नेछ । मर्जरअघि नै काष्टमण्डप डेभलपमेन्ट बैंकले २५ प्रतिशत हकप्रद सेयर जारी गर्नेछ । काष्ठमण्डपले जारी गर्ने २५ प्रतिशत हकप्रद तथा काष्ठमण्डपले यसअघि एक्वायर गर्ने सम्झौता गरेका महाकाली विकास, पश्चिमाञ्चल फाइनान्सको समेत गर्दा एक अर्ब ७० करोड रुपैयाँ पुँजी थपिनेछ । काष्टमण्डपको चुक्ता पूँजी ६७ करोड ९८ लाख रुपैयाँ रहेको छ भने महाकाली विकास बैंकको चुक्ता पूँजी १२ करोड ७२ लाख रुपैयाँ रहको छ । त्यस्तै पश्चिामाञ्चल फाइनान्सको चुक्ता पूँजी ३० करोड रुपैयाँ रहेको छ भने काक्रे विहार विकास बैंकको ६ करोड रुपैयाँ पूँजी रहेको छ । यी ४ वटा संस्थालाई एक्वायर गरेपछि कुमारी बैंकको चुक्ता पुँजी सवा छ अर्ब रुपैयाँ पुग्नेछ । एक्वायरपछि बन्ने संस्थाको निक्षेप ५० अर्ब र कर्जा ४१ अर्ब रुपैयाँ पुग्ने छ । यसैगरी, देशभर ८० वटा शाखा पुग्नेछन् ।
