बैंकिङ खबर / सन नेपाल लाइफ इन्स्योरेन्स कम्पनी लिमिटेडले सूचना सुरक्षा व्यवस्थापन प्रणालीसम्बन्धी अन्तर्राष्ट्रिय प्रमाणीकरण नवीकरण गरेको छ । कम्पनीले ग्राहक तथा अन्य सरोकारवालाका संवेदनशील सूचना सुरक्षित राख्न अपनाउँदै आएको सूचना सुरक्षा प्रणालीलाई निरन्तरता दिएको जनाएको छ ।
कम्पनीका अनुसार प्रमाणीकरणको नवीकरणले सूचना सुरक्षासम्बन्धी जोखिम पहिचान, मूल्याङ्कन तथा व्यवस्थापनलाई थप व्यवस्थित बनाउन सहयोग पुग्नेछ । साथै, संस्थाले लागू गरेका सुरक्षा उपायको प्रभावकारिता नियमित रूपमा परीक्षण तथा सुधार गर्नसमेत यसले आधार प्रदान गर्नेछ । सूचना सुरक्षा व्यवस्थापन प्रणालीले मुख्य रूपमा सूचनाको गोपनीयता, अखण्डता र उपलब्धतालाई केन्द्रमा राख्छ । गोपनीयताअन्तर्गत संवेदनशील सूचनामा अधिकारप्राप्त व्यक्तिको मात्र पहुँच सुनिश्चित गर्ने व्यवस्था हुन्छ भने अखण्डताले सूचनालाई सही, पूर्ण र विश्वसनीय अवस्थामा राख्ने विषयलाई समेट्छ । त्यस्तै, उपलब्धताको उद्देश्य आवश्यक परेको समयमा अधिकारप्राप्त प्रयोगकर्तालाई सम्बन्धित सूचना तथा प्रणाली सहज रूपमा उपलब्ध गराउनु हो ।
जीवन बीमा व्यवसायमा ग्राहकका व्यक्तिगत विवरणदेखि बीमालेख, प्रिमियम भुक्तानी तथा दाबीसम्बन्धी अभिलेखसम्म विभिन्न प्रकारका संवेदनशील सूचना व्यवस्थापन गर्नुपर्ने हुन्छ । डिजिटल माध्यमबाट बीमा सेवा विस्तार भइरहेका बेला यस्ता सूचनाको सुरक्षित व्यवस्थापन ग्राहकको विश्वास तथा सेवाको विश्वसनीयतासँग प्रत्यक्ष रूपमा जोडिने कम्पनीको भनाइ छ ।
सन नेपाल लाइफले सूचना सुरक्षा जोखिम व्यवस्थापनलाई थप प्रभावकारी बनाउँदै लैजाने जनाएको छ । यसका साथै कर्मचारीमा सूचना सुरक्षासम्बन्धी सचेतना अभिवृद्धि गर्ने तथा सूचना प्रणाली र आन्तरिक प्रक्रियामा आवश्यक सुधारलाई निरन्तरता दिने कम्पनीले जनाएको छ ।
