कृषि विकास बैंकले आफ्ना सेयरधनीलाई २० प्रतिशत बोनस सेयर वितरण गर्ने भएको छ । बैंकको विहीबार बसेको संचालक समितिको बैठकले गत आर्थिक वर्षको कमाईबाट उक्त अनुपातमा बोनस सेयर वितरण गर्ने प्रस्ताव अघि सारेको हो । कर प्रयोजनका लागि बैंकले १.०५३ नगद लाभांश पनि दिनेछ । प्रस्तावित बोनस सेयर नियामक नेपाल राष्ट्र बैंकबाट स्विकृत भई बैंकको आगामी साधारणसभाले पारित गरेपछि मात्रै सेयरधनीले पाउनेछन् ।
अघिल्लो महिनामा हकप्रद सेयर निष्काशन गरेको बैंकले हकप्रद वितरण गरेपछि कायम हुने चुक्तापुँजीको २० प्रतिशत बोनस सेयर दिन लागेको हो । उक्त हकप्रद सेयर पाएका सेयरधनीले पनि बोनस सेयर पाउने बैंकले स्पष्ट पारेको छ ।
हाल कृषि विकास बैंकको चुक्तापुँजी तीन अर्ब ९३ करोड ७६ लाख रुपैयाँ रहेको छ । निष्काशीत हकप्रद वितरण गरेपछि बैंकको चुक्तापुँजी ५ अर्ब ९३ करोड ७६ लाख रुपैयाँ पुग्नेछ । २० प्रतिशत बोनसपछि बैंकको पूँजी सात अर्ब १२ करोड ५१ लाख रुपैयाँ पुग्नेछ ।
