September 20th, 2024

केन्द्रीय बैंकले एक महिनामै तान्यो ४ खर्ब ७० अर्ब

बैंकिङ खबर/ नेपाल राष्ट्र बैंकले एक महिनाको अवधिमा ४ खर्ब बढी तरलता प्रशोचन गरेको छ । केन्द्रीय बैंकले भदौ महिनाभर पटक– पटक गरी ४ खर्ब ७० अर्ब तरलता खिचेको हो । केन्द्रीय बैंकले एकै महिना ४ खर्ब ७० अर्ब रुपैयाँ तानेपछि हाल वाणिज्य बैंकहरुमा कूल लगानीयोग्य रकम ६ खर्ब रुपैयाँ हाराहारी छ । राष्ट्र बैंकले बैंकहरुमा लगानी थुप्रिएर अन्तर बैंक ब्याजदर घट्न थालेपछि बजारबाट पैसा तानेको हो ।

केन्द्रीय बैंकले मौद्रिक नीतिमार्फत बैंक तथा वित्तीय संस्थालाई निक्षेपको ९० प्रतिशतसम्म अर्थात् कर्जा/निक्षेप अनुपात (सीडी रेसियो) ९० प्रतिशतसम्म कायम गर्न पाउने सुविधा दिएको छ । तर, केन्द्रीय बैंकको पछिल्लो तथ्यांकअनुसार हाल बैंकहरूले ७८.७९ प्रतिशत सीडी रेसियो कायम गरेका छन् ।

बैंकिङ्ग प्रणालीमा रकम थुप्रिँदै गएपछि राष्ट्र बैंकलाई नै तरलता व्यवस्थापन गर्न सकस हुने गर्छ । सोही सकसलाई न्यूनीकरण गर्नकै लागि राष्ट्र बैंकले निक्षेप संकलन उपकरणहरुको प्रयोग गर्दै बैंकिङ्ग प्रणालीबाट पैसा खिच्ने गर्छ । अहिले हरेक हप्ताको आइतबार, बुधबार र बिहीबार गरी ३ दिन बैंकहरुले निक्षेप राष्ट्र बैंकमा जम्मा गर्न पाउने सुविधा दिएको छ ।

राष्ट्र बैंकले निक्षेप संकलनको ब्याजदर करिडोरको तल्लो सीमा अर्थात ३ प्रतिशत तोकेको छ । राष्ट्र बैंककाअनुसार हाल बैंकिङ्ग प्रणालीमा निक्षेप ६५ खर्ब ५ अर्ब र कुल कर्जा लगानी ५२ खर्ब १६ अर्ब पुगेको छ । केन्द्रीय बैंकको तथ्यांकअनुसार हाल अन्तरबैंक ब्याजदर न्यूनतम ३ प्रतिशत कायम भएको छ ।