बैंकिङ खबर/खोटाङको दिक्तेलमा रहेको लालुपाते बहुउद्देश्यीय सहकारी संस्थाको बचत ठगीसम्बन्धी कसुरमा ३५ जना प्रतिवादीविरुद्ध जिल्ला अदालतमा अभियोग पत्र दायर भएको छ ।
बचतकर्ताको लगानी अपचलन भएको विषयमा सहकारीका वर्तमान तथा निवर्तमान सञ्चालक समिति, सहकारीका तत्कालीन अध्यक्ष अनिल जोशी (मृतक) तथा उनका परिवार, सहकारीका प्रबन्धक, लेखापाल र ऋणीविरुद्ध जिल्ला अदालतमा अभियोग पत्र दायर भएको हो ।
मुलुकी फौजदारी कार्यविधि संहिता २०७४ को दफा ३२ बमोजिम प्रतिवादीविरुद्ध अभियोग पत्र दायर भएको जिल्ला अदालत खोटाङका स्रेस्तेदार सीताराम खड्काले बताए ।
सहकारीका दुई सय ६५ जना बचतकर्ताले ३५ जना प्रतिवादीबाट चार करोड ४० लाख ६१ हजार १८ रुपैयाँ बिगो माग दाबी गरेका छन् । अभियोग पत्र पेस भएसँगै बिहीवारदेखि नै नौ जना प्रतिवादीको बयान शुरु गरिएको अदालतले जनाएको छ । ‘प्रतिवादीको बयान सकिएपछि बहस हुन्छ ।
बचतकर्ताले आठ सयदेखि ५५ लाख रुपैयाँसम्म बचत फिर्ताका लागि निवेदन दिएका प्रहरीले जनाएको छ । बचत डुबाइदिएको भन्दै बचतकर्ताले पहिलोपल्ट २०७९ फागुन २ गते सहकारीका अध्यक्ष जोशीको परिवारका पाँच सदस्यसहित आठ जनाविरुद्ध जिल्ला प्रहरी कार्यालयमा जाहेरी दिएका थिए । केही समयअघि सञ्चालक र केही ऋणीविरुद्ध पनि बचतकर्ताले जाहेरी दिएका थिए ।
