लक्ष्मी बैंकले चालु अर्थिक वर्षको पहिलो त्रैमासमा १५ करोड ६८ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा ४२ दशमलव १६ प्रतिशत बढी नाफा कमाएको हो । गत आर्थिक वर्षको पहिलो त्रैमासमा लक्ष्मीले ११ करोड ३ लाख रुपैयाँ मुनाफा आर्जन गरेको थियो ।
तीन अर्ब तीन करोड ९२ लाख २९ हजार रुपैयाँ चुक्तापुँजी भएको बैंकको खुद व्याज आम्दानी ५० दशमलव ४९ प्रतिशतले बढेर ४३ करोड ९६ लाख रुपैयाँ पुगेको छ । त्यस्तै गरी सञ्चालन मुनाफा ३१ दशमलव ४३ प्रतिशतले बढेर २३ करोड ३५ लाख रुपैयाँ पुगेको छ ।
बैंकले निक्षेपमा गत वर्षको तुलनाभन्दा २४ दशमलव ५१ प्रतिशतले वृद्धि गरी ५१ अर्ब ४९ करोड ९९ लाख रुपैयाँ संकलन गरेको छ । यता, कर्जातर्फ ३१ दशमलव ०६ प्रतिशत बढाएर ४४ अर्ब ६४ करोड ९४ लाख रुपैयाँ लगानी गरेको छ ।
यो अवधिमा बैंकको निष्कृय कर्जा घटेको छ भने जोखिमयुक्त सम्पत्ती बढेको छ । बैंकको निष्कृय कर्जा शुन्य दशमलव ७५ प्रतिशतले घटेर १ दशमलव ६३ प्रतिशत पुगेको छ भने जोखिमयुक्त सम्पत्ति शुन्य दशमलव ०१ प्रतिशतले बढेर १० दशमलव ९१ प्रतिशत पुगेको छ । बैंकले प्राभिजनमा १६ करोड २५ लाख रुपैयाँ राखेको छ । जगेडाकोषमा ३ अर्ब ४४ करोड ७१ लाख रुपैयाँ राखेको छ ।
बैंकको प्रतिशेयर आम्दानी १७ दशमलव ८८ रुपैयाँ, मुल्य आम्दानीको अनुपात ५० दशमलव ०६ गुणा, प्रतिशेयर नेटवर्थ २ सय १० दशमलव ४३ रुपैयाँ र तरलता अनुपात २१ दशमलव ८३ प्रतिशत रहेको छ ।
