आइतबार दुई वटा लघुवित्त वित्तीय संस्थाले लाभांश घोषणा गरेका छन् । स्वाबलम्बन लघुवित्त र महुली सामुदायिक लघुवित्तले गत आर्थिक वर्षको कमाईबाट लाभांश वितरण गर्न लागेका हुन् ।
स्वाबलम्बन लघुवित्त विकास बैंक लिमिटेडले आफ्ना सेयरधनीलाई २० प्रतिशत बोनस सेयर र ११.५७८ प्रतिशत नगद लाभांश वितरण गर्ने भएको छ । बैंक संचालक समितिको शुक्रबार बसेको २७४औँ वैठकले उक्त निर्णय गरेको हो । जसअनुसार, बैंकका सेयरधनीले चार करोड ८५ लाख ११ हजार पाँच सय पाँच रुपैयाँ नगद लाभांश र आठ करोड ३७ लाख ९२ हजार छ सय रुपैयाँ बराबरको आठ लाख ३७ हजार नौ सय २६ कित्ता बोनस सेयर पाउनेछन् । स्वाबलम्बन लघुवित्तको चुक्तापुँजी ४१ करोड ८९ लाख ६३ हजार रुपैयाँ रहेको छ । बोनस सेयर वितरण गरेपछि लघुवित्तको चुक्तापुँजी ५० करोड रुपैयाँ पुग्नेछ ।
त्यस्तै, महुली सामुदायिक लघुवित्त वित्तीय संस्था लिमिटेडले चुक्तापुँजीको ५० प्रतिशत बोनस सेयर दिने भएको छ । संस्थाको शनिबार बसेको संचालक समितिको ६७औँ वैठकले हाल कायम चुक्तापुँजीको ५० प्रतिशत बोनस सेयर र १० प्रतिशत नगद लाभांश दिने निर्णय गरेको हो । सोही बैठकले बोनसपछि कायम चुक्तापुँजीको ५० प्रतिशत अर्थात दुई बराबर एकको अनुपातमा हकप्रद सेयर निष्काशन गर्ने निर्णय समेत गरेको छ । हाल महुलीको चुक्तापुँजी चार करोड रुपैयाँ रहेको छ । बोनस र हकप्रदपछि लघुवित्तको चुक्तापुँजी नौ करोड रुपैयाँ पुग्नेछ ।
दुवै लघुवित्तको संचालक समितिद्धारा प्रस्तावित लाभांश नेपाल राष्ट्र बैंकबाट स्वीकृत भई आगामी साधारणसभाबाट पारित भएपछि मात्र सेयरधनीले पाउनेछन् । महुलीले हकप्रद सेयर निष्काशन गर्ने अनुमतिका लागि नेपाल धितोपत्र बोर्डमा निवेदन दिनेछ ।
