ओम डेभलपमेन्ट बैंक लिमिटेडले चालू आर्थिक वर्षको दोस्रो त्रैमासमा १९ करोड दुई लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा झन्डै तीन गुणा बढी नाफा कमाएको हो । गत आर्थिक वर्षको दोस्रो त्रैमासमा ओमले छ करोड ३९ लाख ६८ हजार रुपैयाँ खुद मुनाफा आर्जन गरेको थियो ।
ओमले खुद व्याज आम्दानी र सञ्चालन मुनाफामा पनि कमालको प्रगती हासिल गरेको छ, जसले खुद मुनाफा वृद्धिमा सहयोग गरेको छ । बैंकको खुद व्याज आम्दानी र सञ्चालन मुनाफा दुबै गत आर्थिक वर्षको दोस्रो त्रैमासको तुलनामा साढे दुई गुणा बढेको छ । जसअनुसार, बैंकको खुद व्याज आम्दानी १२ करोड ८५ लाख रुपैयाँबाट बढेर ३५ करोड ३१ लाख रुपैयाँ पुगेको छ भने सञ्चालन मुनाफा १० करोड चार लाख रुपैयाँबाट बढेर २८ करोड २४ लाख रुपैयाँ पुगेको छ ।
त्यस्तै, बैंकको निक्षेप संकलन र कर्जा लगानी पनि गत आर्थिक वर्षको दोस्रो त्रैमासको तुलनामा साढे दुई गुणाले बढेका छन् । बैंकको निक्षेप पाँच अर्ब ३३ करोड २५ लाख १४ हजार रुपैयाँबाट बढेर १२ अर्ब ९९ करोड ५० लाख ८३ हजार रुपैयाँ पुगेको छ भने कर्जा लगानी चार अर्ब ४४ करोड ६९ लाख ८१ हजार रुपैयाँबाट बढेर ११ अर्ब ४३ करोड ५२ लाख ३५ हजार रुपैयाँ पुगेको छ ।
चालू आवको दोस्रो त्रैमासमा बैंकको जगेडा कोष २ गुणा बढेर ४५ करोड ७३ लाख रुपैयाँ पुगेको छ । निष्कृय कर्जा १ दशमलव २६ प्रतिशत रहेको छ । बैंकको निष्कृय कर्जा गत आर्थिक वर्षको दोस्रो त्रैमासमा ०.४२ प्रतिशत थियो भने चालू आर्थिक वर्षको पहिलो त्रैमासमा १.९६ प्रतिशत रहेको थियो । पुस मसान्तसम्ममा ओम डेभलपमेन्ट बैंकको प्रतिसेयर नेटवर्थ एक सय ३३ रुपैयाँ ६२ पैसा रहेको छ भने तरलता अनुपात २६.३२ प्रतिशत रहेको छ ।
