बैंकिङ खबर / अर्थमन्त्री डा. स्वर्णिम वाग्ले नेपालको आर्थिक तथा वित्तीय हितसँग जोडिएका महत्वपूर्ण विषयमा उच्चस्तरीय छलफल गर्न संयुक्त राज्य अमेरिका पुगेका छन्। दुई सदस्यीय प्रतिनिधिमण्डलको नेतृत्व गर्दै वासिङ्टन डीसी पुगेका मन्त्री वाग्लेले अमेरिकी सरकार तथा विश्व बैंकका उच्च अधिकारीसँग भेटवार्ता गर्ने कार्यक्रम रहेको छ । वासिङ्टनस्थित नेपाली दूतावासमा कार्यवाहक राजदूत शरदराज आरनसहित दूतावासका अधिकारीहरूले अर्थमन्त्री वाग्लेलाई स्वागत गरेका छन् ।
अमेरिका भ्रमणका क्रममा वाग्लेले अमेरिकी अर्थमन्त्री तथा ट्रेजरी सचिव स्कट बेसेन्ट र विश्व बैंक समूहका अध्यक्ष अजय बङ्गासँग छुट्टाछुट्टै भेटवार्ता गर्नेछन्। भेटमा नेपाल–अमेरिका आर्थिक सहकार्य विस्तार, विकास साझेदारी, वित्तीय प्रणालीको विश्वसनीयता तथा नेपालको समग्र आर्थिक सुधारका विषयमा छलफल हुने अपेक्षा गरिएको छ ।
FATF ग्रे लिस्टबाट बाहिरिने विषय प्राथमिकतामा
अर्थमन्त्री वाग्लेको भ्रमणमा नेपालको वित्तीय प्रणालीसँग प्रत्यक्ष सम्बन्धित फाइनान्सियल एक्सन टास्क फोर्स (FATF) को ग्रे लिस्टबाट बाहिरिने प्रयास महत्वपूर्ण विषयका रूपमा रहनेछ । सम्पत्ति शुद्धीकरण तथा आतंकवादी गतिविधिमा वित्तीय लगानी नियन्त्रणसम्बन्धी अन्तर्राष्ट्रिय मापदण्डको प्रभावकारी कार्यान्वयन, वित्तीय पारदर्शिता तथा नियामकीय सुधारका विषयमा अमेरिकी पक्ष र अन्तर्राष्ट्रिय वित्तीय संस्थासँग छलफल हुने बताइएको छ।
FATF सम्बन्धी सुधारलाई प्रभावकारी रूपमा अघि बढाउन सके नेपालको वित्तीय प्रणालीप्रतिको अन्तर्राष्ट्रिय विश्वास बढ्नुका साथै वैदेशिक लगानी तथा अन्तर्राष्ट्रिय वित्तीय कारोबारका लागि समेत सकारात्मक वातावरण निर्माण हुने अपेक्षा गरिएको छ ।
विश्व बैंकसँग विकास वित्त र पुनर्निर्माणबारे छलफल
विश्व बैंक समूहका अध्यक्ष अजय बङ्गासँगको भेटमा नेपालमा विकास वित्त परिचालन तथा पूर्वाधार विकासका विषयमा छलफल हुनेछ। हालै भोटेकोशी क्षेत्रमा आएको बाढीबाट क्षतिग्रस्त भौतिक तथा आर्थिक पूर्वाधारको पुनर्निर्माण र पुनःस्थापनाका लागि आवश्यक अन्तर्राष्ट्रिय सहयोग जुटाउने विषयलाई समेत भ्रमणमा प्राथमिकता दिइनेछ। बाढी प्रभावित क्षेत्रको पुनर्निर्माणसँगै भविष्यमा प्राकृतिक विपद्बाट हुने क्षति न्यूनीकरण गर्न उत्थानशील पूर्वाधार निर्माण तथा त्यसका लागि आवश्यक स्रोत परिचालनका विषयमा पनि छलफल हुने बताइएको छ।
अमेरिकी ट्रेजरी र DFC सँग लगानीको सम्भावना खोजिँदै
वाग्लेले अमेरिकी अर्थ मन्त्रालय तथा इन्टरनेसनल डेभलपमेन्ट फाइनान्स कर्पोरेसन (DFC) का वरिष्ठ अधिकारीसँग समेत भेटवार्ता गर्ने कार्यक्रम छ। नेपालमा विकास वित्त परिचालन, पूर्वाधार क्षेत्रमा लगानी विस्तार तथा निजी क्षेत्रको पुँजी परिचालनका सम्भावनाबारे अमेरिकी पक्षसँग छलफल गरिनेछ। अमेरिकी निजी क्षेत्रका लगानीकर्तासँग समेत संवाद गरी नेपालमा लगानीका अवसर र सम्भावित क्षेत्रबारे जानकारी गराउने तयारी छ। विशेषगरी सडक, विद्युत् प्रसारण लाइनलगायत आर्थिक पूर्वाधारमा लगानी विस्तार गर्दै रोजगारी सिर्जना र आर्थिक गतिविधि बढाउने विषयमा अन्तर्राष्ट्रिय साझेदार तथा निजी क्षेत्रको सहकार्य खोजिनेछ।
वित्तीय विश्वसनीयता बढाउने अवसर
नेपालका लागि अहिले वित्तीय प्रणालीलाई थप पारदर्शी र विश्वसनीय बनाउनु तथा अन्तर्राष्ट्रिय लगानी आकर्षित गर्न अनुकूल वातावरण निर्माण गर्नु महत्वपूर्ण विषय बनेको छ। यस्तो अवस्थामा अमेरिकी ट्रेजरी, विश्व बैंक, DFC तथा अमेरिकी निजी क्षेत्रसँग हुने छलफललाई नेपालले आर्थिक कूटनीति र वित्तीय साझेदारी विस्तार गर्ने अवसरका रूपमा उपयोग गर्ने अपेक्षा गरिएको छ। अर्थमन्त्री वाग्लेको भ्रमणबाट FATF सम्बन्धी सुधार, विकास वित्त परिचालन, बाढीपछिको पुनर्निर्माण तथा निजी लगानी विस्तारका क्षेत्रमा थप अन्तर्राष्ट्रिय सहकार्यको आधार तयार हुने सरकारको अपेक्षा छ ।
