बैंकिङ खबर / रसुवाको टिमुरे, स्याफ्रुबेँसीलगायत क्षेत्रमा आएको भीषण बाढीका कारण बैंकिङ क्षेत्रसमेत गम्भीर रूपमा प्रभावित भएको छ। बाढीले भोटेकोशी नदी आसपास सञ्चालनमा रहेका ९ वटा वाणिज्य बैंकका शाखामा क्षति पुर्याएको प्रारम्भिक विवरण आएको छ भने ती शाखामा कार्यरत करिब २६ कर्मचारीसँग सम्पर्क हुन सकेको छैन । नेपाल बैंकर्स संघका अनुसार बाढी प्रभावित क्षेत्रमा माछापुच्छ्रे बैंक, नबिल बैंक, सानिमा बैंक, लक्ष्मी सनराइज बैंक, हिमालयन बैंक, प्रभु बैंक, ग्लोबल आईएमई बैंक, नेपाल इन्भेस्टमेन्ट मेगा बैंक र एनएमबी बैंकका शाखा सञ्चालनमा थिए। तीमध्ये अधिकांश शाखा बाढीको उच्च प्रभावमा परेका छन्। पछिल्लो विवरणअनुसार नबिल बैंकका सबै कर्मचारी सम्पर्कमा आएका छन् भने अन्य बैंकका केही कर्मचारीसँग पनि क्रमशः सम्पर्क स्थापित भइरहेको छ।
बैंकर्स संघका अनुसार प्रारम्भिक सूचनामा शाखा कार्यालयका भवन तथा संरचनामा ठूलो क्षति पुगेको छ। बाढीको तीव्र बहावले शाखा रहेका बजार क्षेत्रमै व्यापक क्षति पुर्याएकाले कतिपय बैंकका शाखा पूर्ण रूपमा क्षतिग्रस्त वा बगाएको अवस्थामा पुगेका छन्। तर शाखाभित्र रहेको नगद, महत्वपूर्ण कागजात, कम्प्युटर तथा अन्य बैंकिङ उपकरण, फर्निचर, सर्भर तथा विद्युतीय सामग्रीको अवस्था भने यकिन हुन सकेको छैन। सञ्चार सम्पर्क र भौतिक पहुँच अवरुद्ध भएकाले बैंकहरूले तत्कालै विस्तृत क्षति मूल्यांकन गर्न नसकेको जनाएका छन्। बाढीले शाखा कार्यालयसँगै बैंकिङ सेवा सञ्चालनका लागि आवश्यक पूर्वाधारमा समेत असर पारेको छ। प्रभावित क्षेत्रमा विद्युत् तथा टेलिफोन सेवा अवरुद्ध हुँदा बैंकका केन्द्रीय कार्यालयले शाखामा कार्यरत कर्मचारीसँग सम्पर्क गर्न र शाखाको वास्तविक अवस्था बुझ्न कठिन भएको हो। बाढीका कारण टेलिफोन तथा इन्टरनेटका टावरमा समेत क्षति पुगेकाले सञ्चार सम्पर्क पुनःस्थापित हुन समय लाग्ने देखिएको छ।
नेपाल बैंकर्स संघले विपद्को पहिलो प्राथमिकता कर्मचारीको सुरक्षा र उद्धार रहेको जनाएको छ। संघले प्रभावित बैंकका कर्मचारीको खोजी तथा उद्धारका लागि सम्बन्धित सुरक्षा निकायसँग समन्वयसमेत गरिरहेको छ। कर्मचारीको अवस्थाबारे पूर्ण जानकारी प्राप्त भएपछि मात्रै शाखा कार्यालय तथा बैंकिङ सम्पत्तिमा भएको क्षतिको विस्तृत विवरण संकलन गरिने बताइएको छ। बाढीका कारण प्रभावित शाखामा रहेका नगद तथा अन्य वित्तीय सम्पत्तिको वास्तविक अवस्था अहिले नै सार्वजनिक गर्न सकिने स्थिति छैन। शाखा क्षेत्रमा प्रत्यक्ष पुगेर निरीक्षण गर्न नसकिएकाले कति नगद, कागजात, कम्प्युटर, एटीएम वा अन्य उपकरणमा क्षति पुगेको हो भन्ने विवरणसमेत यकिन हुन बाँकी छ। सञ्चार र सडक सम्पर्क सहज भएपछि मात्रै बैंकहरूले शाखागत रूपमा क्षतिको मूल्यांकन गर्नेछन्।
यसैबीच, बाढीले बैंकका शाखा मात्र नभई प्रभावित क्षेत्रमा रहेका बजार, सडक, पुल, भन्सार पूर्वाधार तथा निजी तथा सार्वजनिक संरचनामा समेत ठूलो क्षति पुर्याएको छ। टिमुरे, स्याफ्रुबेँसीलगायत क्षेत्रको ठूलो हिस्सा प्रभावित भएपछि त्यहाँको नियमित आर्थिक गतिविधिसमेत अवरुद्ध भएको छ। बैंकिङ क्षेत्रका लागि भने अहिले सबैभन्दा ठूलो चुनौती कर्मचारीको सुरक्षित उद्धारसँगै शाखा तथा बैंकिङ प्रणालीलाई पुनः सञ्चालनमा ल्याउनु बनेको छ। शाखा कार्यालयमा भएको भौतिक क्षति, बैंकिङ उपकरण तथा अभिलेखको अवस्था र सम्भावित वित्तीय क्षतिको यकिन विवरण प्राप्त हुन अझै केही समय लाग्ने देखिएको छ। बैंकहरूले सञ्चार तथा भौतिक पहुँच सहज भएपछि मात्रै विस्तृत क्षति विवरण सार्वजनिक गर्ने तयारी गरेका छन्।
