बैंकिङ खबर / केही दिनअघि प्रधानमन्त्रीले नेपाल राष्ट्र बैंकका गभर्नरसँग छुट्टै भेटवार्ता गरेका थिए। त्यसयता आर्थिक नीति निर्माण र कार्यान्वयनमा सरकार तथा केन्द्रीय बैंकबीचको समन्वयबारे विभिन्न टिप्पणी भइरहेका बेला मंगलबार अर्थमन्त्री डा. स्वर्णिम वाग्लेले भने २० वाणिज्य बैंकका प्रमुख कार्यकारी अधिकृत (सीईओ) सँग प्रत्यक्ष छलफल गर्न लागेका छन्।
अर्थ मन्त्रालयका अनुसार दिउँसो ३ बजे हुने छलफलमा बजेटले घोषणा गरेका आर्थिक सुधारका कार्यक्रम कार्यान्वयनमा बैंकहरूको भूमिका, वित्तीय बजारको वर्तमान अवस्था, कर्जा प्रवाह, लगानीको वातावरण तथा निजी क्षेत्रका चुनौतीबारे सीईओहरूको धारणा लिइनेछ।
सामान्यतया बैंकिङ क्षेत्रसँग सम्बन्धित नीति, नियमन र सुपरिवेक्षणको मुख्य जिम्मेवारी नेपाल राष्ट्र बैंकको हुने भएकाले अर्थमन्त्रीले सिधै वाणिज्य बैंकका सीईओसँग सामूहिक छलफल गर्न लागेको घटनाले आर्थिक वृत्तमा चासो बढाएको छ। यसलाई सरकारले बजेट कार्यान्वयनलाई तीव्र बनाउन खोजेको प्रयासका रूपमा पनि हेरिएको छ भने अर्कोतर्फ आर्थिक नेतृत्वका विभिन्न तहबीच समानान्तर संवादको संकेतका रूपमा पनि व्याख्या हुन थालेको छ।
विशेषगरी प्रधानमन्त्री–गभर्नर भेटपछि अर्थमन्त्रीले गभर्नरको उपस्थितिबिनै बैंकका सीईओसँग छलफल गर्न लागेका कारण सरकारको आर्थिक नेतृत्वभित्र समन्वय कसरी भइरहेको छ भन्ने प्रश्न पनि उठ्न थालेको छ। यद्यपि मन्त्रालयले भने यो छलफललाई बजेट कार्यान्वयनका लागि वित्तीय क्षेत्रको सुझाव संकलन गर्ने नियमित संवादका रूपमा व्याख्या गरेको छ।
अब यो छलफलबाट बैंकहरूले लगानी विस्तार, कर्जा प्रवाह र निजी क्षेत्रको मनोबल बढाउने विषयमा के सुझाव दिन्छन् र सरकारले त्यसलाई कसरी नीतिगत निर्णयमा रूपान्तरण गर्छ भन्ने पक्षलाई अर्थतन्त्रले नजिकबाट हेर्नेछ।
