जलविद्युत् क्षेत्रमा बैंकहरूको लगानी ४ खर्ब ४८ अर्ब

बैंकिङ खबर/ बैंक तथा वित्तीय संस्थाहरूले जलविद्युत् क्षेत्रमा ४ खर्ब ४८ अर्ब ७८ करोड रुपैयाँ कर्जा लगानी गरेका छन्। यो बैंकहरूको कुल कर्जाको करिब ७.९७ प्रतिशत हो।

नेपाल राष्ट्र बैंकका तथ्यांकअनुसार चालु आर्थिक वर्ष भदौ मसान्तसम्म बैंक तथा वित्तीय संस्थाहरूले कुल ५६ खर्ब २७ अर्ब ५ करोड रुपैयाँ लगानी गरेका छन्। यसमध्ये वाणिज्य बैंकहरू अग्रस्थानमा छन्। वाणिज्य बैंकहरूले मात्रै ४ खर्ब ४० अर्ब ३ करोड रुपैयाँ जलविद्युत् क्षेत्रमा लगानी गरेका छन्। विकास बैंकले ८ अर्ब २८ करोड, फाइनान्स कम्पनीले ४६ करोड ३० लाख लगानी गरेका छन्।

राष्ट्र बैंकले जलविद्युत् क्षेत्रलाई प्राथमिकताप्राप्त क्षेत्र घोषित गर्दै बैंक तथा वित्तीय संस्थाहरूलाई सीमा तोकेर लगानी गर्न निर्देशन जारी गरेको छ। यसअनुसार वाणिज्य बैंकहरूले २०८२ असारसम्म कर्जाको न्यूनतम ७ प्रतिशत जलविद्युत् क्षेत्रमा लगानी गर्नुपर्छ। राष्ट्र बैंकका सहप्रवक्ता सुमन नेउपानेका अनुसार २०८५ असारसम्म यो न्यूनतम १० प्रतिशत पुर्याउनुपर्नेछ।

भदौ मसान्तसम्म बैंकहरूले यस क्षेत्रमा गरेको लगानीमा शीर्ष स्थानमा कुमारी बैंक ४२ अर्ब ९७ करोड, नबिल बैंक ४० अर्ब ८६ करोड, नेपाल इन्भेष्टमेन्ट मेगा बैंक ३२ अर्ब ३७ करोड, एनएमबि बैंक ३० अर्ब ७५ करोड, स्टान्डर्ड चार्टर्ड बैंक ८ अर्ब ४३ करोड र लक्ष्मी सनराइज बैंक २९ करोड ८२ लाख रुपैयाँ रहेका छन्।

स्रोत : नेपाल राष्ट्र बैंक