बैंकिङ खबर/ सेयर धितो राखेर ५० लाख रुपैयाँसम्म लिएको कर्जामा जोखिम भार १ सय प्रतिशत मात्रै कायम गरिने भएको छ । नेपाल राष्ट्र बैंकले मौद्रिक नीतिमार्फत यो व्यवस्था लागू गरेको गभर्नर महाप्रसाद अधिकारीले बताए ।
मौद्रिक नीति सार्वजनिकपछि यसबारे प्रष्ट पार्न आयोजित पत्रकार सम्मेलनमा गभर्नर अधिकारीले ५० लाखभन्दा माथिको सेयर धितो कर्जामा भने हालकै जोखिम भार १५० प्रतिशतलाई यथावत राखिने बताए । हाल भने २५ लाख रुपैयाँसम्मको सेयर धितो कर्जामा जोखिमभार १०० प्रतिशत र सोभन्दा माथिको रकममा १५० प्रतिशत गरिएको छ ।
साना ऋणीमा सेयर धितो कर्जा प्रवाहका लागि बैंकहरुलाई प्रोत्साहन गर्ने र ठूलालाई निरुत्साहन गर्ने नीतिअरुप राष्ट्र बैंकले यो कदम चालेको देखिन्छ । सेयर धितोमा जाने सबै कर्जामा जोखिमभार १०० प्रतिशतमा झार्नुपर्ने सुझाव लगानीकर्ताले दिँदै आएका थिए । त्यस्तै सेयर धितो कर्जामा एक व्यक्ति वा संस्थाले पाउने अधिकतम ऋणको सीमा १२ करोडलाई राष्ट्र बैंकले यथावत राखेको छ । यो सीमा पनि हटाउन लगानीकर्ताले माग गर्दै आएका थिए ।
