बैंकिङ खबर/ सेयर नभएका र लामो समयदेखि सञ्चालनमा नआएका निष्क्रिय डिम्याट खाता बन्द गरिने भएको छ । खुलेकामध्ये धेरै खाता निष्क्रिय हुन थालेपछि सीडीएस एण्ड क्लियरिङ (सीडीएससी)ले त्यस्ता खाता बन्द गर्न लागेको हो । विद्यमान कानुनले खातावालाको अनुमतिविना डिम्याट खाता बन्द गर्न पाइँदैन ।
यसकारण उक्त कानुनी व्यवस्थालाई परिमार्जन गरी तोकिएको समयसम्म निष्क्रिय रहेका डिम्याट खाता सीडीएससी आफैले बन्द गर्न पाउने व्यवस्थाका लागि नियामक निकाय धितोपत्र बोर्डमा लेखी पठाइएको सीडीएस एण्ड क्लियरिङले जनाएको छ ।
सीडीएससीका अनुसार बुधबारसम्म ५५ लाख ७३ हजार डिम्याट खाता खुलेका छन् । ती मध्ये १३ लाख ५१ हजार ३ सय ७१ वटा निष्क्रिय छन् । त्यस्तै ३ लाख ८१ हजार खाता दोहोरिएका छन् भने १७ लाख ६३ हजार १ सय १३ वटा खाता सेयरविहीन छन् । हाल डिम्याट खाता खोल्दा र नवीकरण गर्दा एक सय रुपैयाँ शुल्क लाग्छ ।
सेयर पनि नभएका र लामो समयसम्म नवीकरण नभएका खाता अहिले नवीकरण गर्दा लगानीकर्ताले हरेक वर्ष १ सय रुपैयाँका दरले नवीकरण शुल्क तिर्नुपर्छ । जबकि सेयर नभएका निष्क्रिय खाता अहिले बन्द गर्ने र लगानीकर्ताले चाहेको समयमा एक सय रुपैयाँ तिरेर नयाँ खाता खोल्न सक्ने भएकाले निष्क्रिय खाता राखिरहनुको औचित्य नभएको क्लियरिङले जनाएको छ ।
