बैंकिङ खबर । वाणिज्य बैंकहरुले बचत खातामा आठ प्रतिशतभन्दा बढी व्याज नदिने सहमति गरेका छन् । यसअघि मुद्दति निक्षेपमा व्याजदर ११ प्रतिशतभन्दा बढी नपुर्याउने सहमति गरेका बैंकर्सले अब बचत खातामा पनि व्याजदरको सीमा तोकेका हुन् । बचतको ब्याज दर मुद्दति निक्षेपको भन्दा एक प्रतिशत बिन्दुले मात्र कम भएपछि २८ वटै बाणिज्य बैंकका प्रमुख कार्यकारी अधिकृतहरुले यस्तो सहमति गरेका हुन् ।
व्याजदर घटाउन आइतबारसम्मको समय
कतिपय बैंकले बचत खातामा नै १० प्रतिशतसम्म ब्याज दिन थालेका छन् । अहिले एनआइसी एसिया, कुमारी, सिभिल लगायतका बैंकहरुले बचत खातामा १० प्रतिशत ब्याज दिइरहेका छन् । यी बैंकहरुलाई व्याजदर आठ प्रतिशतमा झार्न आइतबारसम्मको समय दिइएको छ ।
कर्जा लगानीमा कडाई
बैंकर्सबीच कर्जा लगानीमा गरिएको कडाईलाई केही समय कायम राख्ने सहमति पनि भएको छ । निक्षेप नबढी कर्जा दिँदा समग्र बैंकिङ प्रणालीमा नै असर पर्ने हुँदा तत्कालका लागि कर्जा लगानीमा कडाई गर्ने परानो सहमतिलाई नै निरन्तरता दिने दिने निर्णय गरेको बैंकर्सको भनाई छ ।
