बैंकिङ खबर / मञ्जुश्री फाइनान्स लिमिटेडले भोटेकोशी क्षेत्रमा गएको भीषण बाढीबाट प्रभावित नागरिकको राहत, उद्धार तथा पुनर्स्थापनाका लागि ३० लाख रुपैयाँ सहयोग गरेको छ ।
फाइनान्सले प्रधानमन्त्री दैवी प्रकोप उद्धार कोषमा ३० लाख रुपैयाँ हस्तान्तरण गरेको हो । २०८३ भदौ १० गते भोटेकोशी क्षेत्रमा आएको विनाशकारी बाढीका कारण ठूलो जनधनको क्षति भएपछि प्रभावित नागरिकलाई राहत तथा पुनर्स्थापनामा सहयोग पुर्याउने उद्देश्यले उक्त रकम प्रदान गरिएको फाइनान्सले जनाएको छ । भोटेकोशी तथा त्रिशूली नदीमा आएको भीषण बाढीका कारण विभिन्न क्षेत्रमा जनधनको क्षति हुनुका साथै घर, व्यवसाय, सडक, पुललगायतका भौतिक संरचनामा समेत ठूलो क्षति पुगेको छ । बाढीका कारण ठूलो संख्यामा नागरिक प्रभावित भएका छन् भने कतिपय परिवार विस्थापित भएका छन् । विपद्पछि प्रभावित क्षेत्रमा राहत तथा उद्धारका गतिविधि सञ्चालन भइरहेका छन् ।
यस्तो कठिन परिस्थितिमा प्रभावित नागरिकको राहत तथा पुनर्स्थापनाका लागि सरकारी कोषमार्फत सहयोग पुर्याउने उद्देश्यले फाइनान्सले उक्त रकम उपलब्ध गराएको हो । फाइनान्सका अनुसार विपद्को समयमा प्रभावित नागरिकलाई आवश्यक सहयोग पुर्याउनु संस्थागत सामाजिक उत्तरदायित्वको महत्वपूर्ण हिस्सा हो । प्राकृतिक विपद्बाट प्रभावित परिवारलाई तत्काल राहत उपलब्ध गराउनुका साथै आगामी दिनमा पुनर्स्थापना र पुनर्निर्माणका लागि समेत स्रोत आवश्यक पर्ने भएकाले प्रधानमन्त्री दैवी प्रकोप उद्धार कोषमा गरिएको सहयोगले सरकारी राहत तथा उद्धार अभियानमा केही योगदान पुग्ने अपेक्षा फाइनान्सले गरेको छ ।
भोटेकोशी क्षेत्रमा आएको बाढीले बैंक तथा वित्तीय संस्था, जलविद्युत् आयोजना, सडक तथा अन्य व्यवसायिक संरचनामा समेत क्षति पुर्याएको छ। विपद्का कारण स्थानीय जनजीवन र आर्थिक गतिविधि प्रभावित बनेको अवस्थामा निजी क्षेत्रबाट हुने राहत तथा सहयोगले प्रभावित समुदायलाई केही हदसम्म राहत पुग्ने अपेक्षा गरिएको छ ।
मञ्जुश्री फाइनान्सले विपद्को यस कठिन घडीमा प्रभावित नागरिकप्रति ऐक्यबद्धता जनाउँदै सहयोग गरेको जनाएको छ। फाइनान्सले सामाजिक उत्तरदायित्वअन्तर्गत विभिन्न समयमा सामाजिक तथा मानवीय क्षेत्रमा सहयोग गर्दै आएको र आगामी दिनमा पनि आवश्यकताअनुसार सहयोगलाई निरन्तरता दिने प्रतिबद्धता व्यक्त गरेको छ ।
फाइनान्सका अनुसार प्राकृतिक विपद्बाट प्रभावित नागरिकको राहत, उद्धार र पुनर्स्थापनामा सरकार, निजी क्षेत्र तथा विभिन्न संघसंस्थाको सामूहिक प्रयास आवश्यक छ । सोही भावनाअनुसार प्रधानमन्त्री दैवी प्रकोप उद्धार कोषमा गरिएको सहयोगले प्रभावित नागरिकको राहत तथा पुनर्स्थापनाका कार्यमा योगदान पुर्याउने विश्वास फाइनान्सले लिएको छ ।
