बैंकिङ खबर/ सुरक्षा र सवारीसाधनको विश्वसनीयतालाई उच्च प्राथमिकतामा राख्दै होंडाले नेपालमा निःशुल्क एयरब्याग रिकोल अभियान सञ्चालन गर्ने भएको छ। कम्पनीले सम्भावित प्राविधिक जोखिम न्यूनीकरण गर्दै सवारीधनीलाई सुरक्षित यात्रा सुनिश्चित गराउने उद्देश्यले यो अभियान सञ्चालन गर्न लागेको जनाएको छ।कम्पनीका अनुसार केही मोडलका सवारीसाधनमा जडान गरिएको एयरब्याग प्रणालीमा प्राविधिक समस्या देखिन सक्ने सम्भावनालाई ध्यानमा राखेर सावधानीका रूपमा रिकोल अभियान सञ्चालन गर्न लागिएको हो। यस अभियानअन्तर्गत प्रभावित सवारीसाधनका एयरब्याग कम्पोनेन्टको निःशुल्क परीक्षण गरिनेछ भने आवश्यक परे नयाँ पार्ट्स जडान गरी प्रतिस्थापनसमेत गरिनेछ। यसका लागि ग्राहकबाट कुनै पनि अतिरिक्त शुल्क नलिइने कम्पनीले जनाएको छ।
होंडाले रिकोल अभियानलाई विश्वव्यापी गुणस्तर तथा सुरक्षा मापदण्डअनुसार सञ्चालन गरिने बताएको छ। कम्पनीका अनुसार सवारीसाधनको नियमित मर्मतसम्भारसँगै सुरक्षा प्रणालीको प्रभावकारिता कायम राख्न समयमै आवश्यक प्राविधिक सुधार गर्नु अत्यन्त महत्वपूर्ण हुन्छ। त्यसैले प्रभावित सवारीधनीलाई आफ्नो गाडीको विवरण आधिकारिक डिलर वा सर्भिस सेन्टरमार्फत यथाशीघ्र जाँच गराउन आग्रह गरिएको छ।कम्पनीले रिकोल अभियान कुनै दुर्घटना वा समस्या भएपछि गरिने प्रक्रिया नभई सम्भावित जोखिमलाई समयमै न्यूनीकरण गर्ने अन्तर्राष्ट्रिय अभ्यास भएको स्पष्ट पारेको छ। विश्वभरका प्रमुख अटोमोबाइल उत्पादकहरूले ग्राहक सुरक्षालाई केन्द्रमा राख्दै आवश्यक पर्दा यस्ता अभियान सञ्चालन गर्ने गरेका छन्।होंडाले प्रभावित सवारीसाधनका ग्राहकलाई फोन, एसएमएस वा अन्य उपलब्ध माध्यमबाट सम्पर्क गरी अभियानबारे जानकारी दिने जनाएको छ। साथै, ग्राहकले आफ्नो सवारीसाधन रिकोल सूचीमा परेको छ वा छैन भन्ने जानकारी कम्पनीका आधिकारिक डिलर, सर्भिस सेन्टर वा आधिकारिक वेबसाइटमार्फत पनि प्राप्त गर्न सक्नेछन्।
कम्पनीका अनुसार एयरब्याग सवारीसाधनको अत्यन्त महत्वपूर्ण सुरक्षा प्रणाली भएकाले यसले दुर्घटनाको अवस्थामा चालक तथा यात्रुको ज्यान जोगाउन महत्वपूर्ण भूमिका खेल्छ। त्यसैले रिकोलमा परेका सवारीधनीले ढिलाइ नगरी निःशुल्क परीक्षण तथा आवश्यक प्रतिस्थापन गराउन कम्पनीले अनुरोध गरेको छ।होंडाले ग्राहकको विश्वास, सुरक्षा र सेवाको गुणस्तरलाई निरन्तर प्राथमिकतामा राख्दै भविष्यमा पनि यस्ता सुरक्षा तथा गुणस्तर अभिवृद्धिसम्बन्धी अभियान सञ्चालन गर्दै जाने जनाएको छ। कम्पनीले यस अभियानले ग्राहकमा सुरक्षित सवारी प्रयोगप्रति थप विश्वास बढ्नुका साथै सडक सुरक्षामा समेत सकारात्मक योगदान पुग्ने विश्वास व्यक्त गरेको छ।
