दशैँ नजिकिँदे गर्दा नयाँ नोट कहिले साट्न पाइएला भन्ने जिज्ञासामा हुनुहुन्छ ? यदि त्यसो हो भने तपाईको लागि उत्तर आइसकेको छ । तपाईले अबको एक महिनाभित्रै नयाँ नोट पाउनुहुनेछ । अर्थात असोज पहिलो साताबाटै तपाईको हातमा नयाँ नोट पर्ने गरी राष्ट्र बैंकले प्रक्रिया थाल्दैछ ।
सर्वसाधरणलाई पैसा साट्न वा उपलब्ध गराउन नेपाल राष्ट्र बैंकबाट बैंक तथा वित्तीय संस्थाले असोज ९ देखि १४ गतेसम्म नयाँ नोट पाउनेछन् । नोट पाएकै भोलिपल्टदेखि वित्तीय संस्थाले सर्वसाधरणलाई नयाँ नोट उपलब्ध गराउनेछन् ।
अघिल्लो वर्ष केन्द्रीय बैंकले बैंक तथा वित्तीय संस्थालाई पर्याप्त नोट उपलब्ध नगराउँदै सर्वसाधरणले लामो लाइनमा बसेर नोट लिएका थिए । तर यो पटक लाइन लागेर बस्नुनपर्ने गरी बैंक तथा वित्तीय संस्थालाई नयाँ नोट उपलब्ध गराईने राष्ट्र बैंकले जनाएको छ । गत बर्ष एक जनालाई २२ हजार रुपैयाँ सटही सुविधा दिइएकोमा यो पटक एक जनाबराबर ३७ हजार रुपैयाँ बराबरको नोट उपलब्ध गराइने भएको छ ।
