बैंकिङ खबर/ बजारमा बढ्दो तरलता नियन्त्रण गर्न नेपाल राष्ट्र बैंकले आज (बुधबार) ६० अर्ब रुपैयाँ बराबरको निक्षेप संकलन गर्ने भएको छ। राष्ट्र बैंकको मौद्रिक व्यवस्थापन विभागका अनुसार ६३ दिन अवधिको लागि ‘बोलकबोल निक्षेप संकलन उपकरण’मार्फत उक्त रकम संकलन गरिनेछ।
यस प्रक्रियामा नेपाल राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्। बोलकबोल ब्याजदरको आधारमा हुनेछ, जहाँ सबैभन्दा कम ब्याजदर दिने प्रस्तावलाई प्राथमिकताका साथ रकम बाँडफाँड गरिने राष्ट्र बैंकले स्पष्ट पारेको छ।
प्रमुख विवरणहरू:
निक्षेप संकलन अवधि: ६३ दिन
बोलकबोल म्याद: असार १८ गते (बुधबार) मध्यान्ह ३ बजेसम्म
बोलकबोल माध्यम: अनलाइन प्रणाली
न्यूनतम बोलकबोल रकम: १० करोड रुपैयाँ
अधिकतम रकम: ५ अर्ब रुपैयाँसम्म, १० करोडको गुणाङ्कमा
राष्ट्र बैंकले बजारबाट तरलता सोस्ने उद्देश्यले असार महिनाभर लगातार निक्षेप संकलन गरिरहेको छ। असार महिनामात्रै यो छैटौँ पटक निक्षेप संकलन गरिएको हो। यसअघि असार १ गते ४० अर्ब, असार ४ गते ९० अर्ब, असार ८ गते ६० अर्ब, असार ११ गते ५० अर्ब, र असार १५ गते ३० अर्ब रुपैयाँ बराबरको तरलता तानिएको थियो।
राष्ट्र बैंकका अनुसार अत्यधिक तरलता रहँदा मुद्रास्फीति तथा वित्तीय प्रणालीमा असन्तुलनको सम्भावना बढ्ने भएकाले सो स्थायित्व कायम गर्न यस्तो मौद्रिक उपकरण प्रयोग गरिएको हो।
