बैंकिङ खबर / अर्थमन्त्रालय अन्तरगतका १० वटा कोषमा ४० अर्ब रुपैयाँभन्दा बढी मौज्दात रकम रहेको पृष्टि भएको छ । यो रकम कर्मचारीको अवकाश सुविधा, औषधि उपचार, सेवा–सुविधा तथा भत्ता भुक्तानीमा खर्च हुनेगरिएको छ। कर्मचारीको तलबबाट कट्टा हुने रकमसहित सरकारले पनि यस्ता कोषमा नियमित रूपमा रकम थप्ने गरेको प्रतिवेदनले जनाएको छ। सरकारले गरेको अध्ययन प्रतिवेदनले सार्वजनिक गरे अनुसार ती संस्थाहरूले उपदान, निवृत्तिभरण, अवकाश सुरक्षा, औषधि उपचार लगायतका शीर्षकमा कोष खडा गरी सो रकम राखेका हुन् । जस अनुसार सबैभन्दा धेरै मौज्दात राष्ट्रिय वाणिज्य बैंकसँग छ २५ अर्ब ७१ करोड रुपैयाँ, कृषि विकास बैंकमा १२ अर्ब २० करोड रुपैयाँ, नेपाल वायुसेवा निगमसँग ६१ करोड रुपैयाँ, सार्वजनिक सेवा प्रसारण नेपालसँग ४२ करोड र निक्षेप तथा कर्जा सुरक्षा कोषसँग ३८ करोड रुपैयाँ रहेको प्रतिवेदनले जनाएको छ। जडीबुटी तथा प्रशोधन कम्पनी लिमिटेडसँग ७ करोड, र काठमाडौँ उपत्यका खानेपानी बोर्डसँग ३ करोड मौज्दात रहेको छ।
